KAMPUNI ZA SIMU ZATAKIWA KUFANYA TAFITI,KUTATUA KERO ZA MAWASILIANO KWA WANANCHI

 KAMPUNI ZA SIMU ZATAKIWA KUFANYA TAFITI,KUTATUA KERO ZA MAWASILIANO KWA WANANCHI

NAIBU WAZIRI WA MAWASILIANO,TEKNOLOJIA YA HABARI,MHANDISI ANDREA KUNDE(KUSHOTO) AKIWA NA KATIBU TAWALA WILAYA YA BAGAMOYO,KASILDA MGENI(KATIKAKATI),WA MWISHO KULIA NI MBUNGE WA JIMBO LA CHALINZE,RIDHIWANI KIKWETE,WAKATI ALIPOFANYA ZIARA KATIKA HALMASHAURI YA WILAYA YA CHALINZE.

NA VICTOR  MASANGU, CHALINZE   

NAIBU Waziri wa Mawasiliano Teknolojia ya Habari Injinia  Andrea  Kundo,  ameyaagiza makampuni mbalimbali ya simu kuhakikisha wanaweka mipango ya kufanya utafiti wa kina katika maeneo  ambayo tayari yameweka uwekezaji wa kufunga mitambo ya minara  ili kuweza kubaini uhitaji wa  wananchi ikiwa ni kuwaondolea adha na usumbufu wa ukosefu wa mawasiliano kwa wananchi.

Kauli hiyo, ameitoa wakati wa ziara yake ya kikazi katika Halmashauri ya Chalinze iliyopo Wilayani Bagamoyo, Mkoani Pwani, kwa ajili ya kuzungumza na watumishi pamoja na mamlaka zinazohusika na mawasiliano ili kujadili changamoto mbalimbali zilizopo na kuzifanyia kazi na kubioresha zaidi sekta ya mawasiliano.

Naibu Waziri huyo, alisema kwamba nia kubwa ya serikali ya awamu ya tano ni kuhakikisha kwamba inaboresha zaidi sekta ya mawasiliano katika maeneo mbalimbali hapa nchini, hivyo ni vema wadau wa masuala hayo wanapaswa kuweka mikakati yao madhubuti ambayo itasaidia kuboresha mitambo yao ambayo wanaifunga ikiwemo  kwenda kuiangalia na kuifanyia ukarabati mara kwa mara ili iweze kufanya kazi vizuri kulingana na mahitaji ya wananchi.

“Hapa kitu kikubwa napenda kuagiza kwamba makampuni haya ya simu inatakiwa sasa kuhakikisha wanafanya uwekezaji wao ambao unatija na kuwafikia wananchi katika maeneo husika lakini kikubwa zaidi ni kufanya utafiti wa maeneo husika hasa ili kutembelea minara ambayo inakuwa imefungwa kwa kipindi cha muda mrefu, lakini kutokana na kuongezeka kwa idadi ya watuamiaji mitambo inashindwa kuwafikia  wananchi katika maeneo mengine kwa hivyo ili ninaliomba sana,”aliongeza Naubi Waziri huyo.

MBUNGE WA JIMBO LA CHALINZE,MKOA WA PWANI,RIDHIWAN KIKWETE AKISISITIZA JAMBO

Kwa upande wake, Mbunge wa Jimbo la Chalinze, Ridhiwani Kikwete ameipongeza serikali ya awamu ya tano kwa juhudi mbalimbali ambazo inazifanya lakini amebainisha kwamba bado kuna baadhi ya vijiji katika jimbo lake kuna changamoto ya  upatikanaji wa mawasilano ya  mtandao hivyo wananchi wanapata shida sana katika  suala zima la kuwasiliana.

Naye, Katibu Tawala wa Wilaya ya Bagamoyo, Kasilda Mgeni pamoja na Mkurugenzi mtendaji wa halmashauri ya Chalinze Ramadhani Posi waliongeza kuwa  kumekuwepo na baadhi ya  madhara yatokanayo na ukosefu wa mawasiliano pindi kunapoibuka  sakata la migogoro ya wakulima na wafugaji inakuwa ni changamoto kupata taarifa kwa wakati na kuomba waongezewe ruzuku katika suala zima la mawasialino.

Kwa upande wake, Mkuu wa Mamlaka ya mawasiliano, TCRA Kanda ya Mashariki, Mhandisi  Lawi Odiero,  amebainisha kwamba lengo ambalo wamejiwekea ni kuhakikisha wanalinda na kuboresha sekta ya mawasiliano kwa kuzingatia sheria, taratibu na miongozo mbali mbali ambayo imetolewa inafutwa bilaya kuvunjwa nia ikiwa ni kuhakikisha kwamba huduma na hiyo inaleta mabadiliko chanya.

“Kwa sasa mabadiliko katika sekta hii kwa kweli yameleta mabadiliko makubwa sana na kuweza kurahisisha na kubadili hata kasi ya maendeleo kutokana na kuendesha na kufanya shughui zetu za kuwasiliana hivyo kumesaidia kuongeza tija zaidi katika mambo mengine hata ya kubadilisha kasi ya maendeleo kwa wananchi wetu wa Tanzania,”alibainisha Mhandisi Odiero.

Kadhalika, aliongeza kuwa kwa sasa, TCRA kwa kushirikiana na wadau mbalimbali wa vyombo vya habari, itawasaidia kwa hali na mali katika kuwapa miongozo mbalimbali ambayo itawasaidia kufungua redio mbalimbali za kijamiii ambazo zitakuwa zikitumika katika kuwafikishia ujumbe mbalimbali juu ya shughuli za kimaendeleo ambazo zinafanyika katika maeneo yao.