BONDE LA WAMI RUVU WAJA NA MPANGO WA KUDHIBITI UHARIBIFU WA VYANZO VYA MAJI

 

MWENYEKITI  WA BODI YA MAJI,BONDE LA WAMI RUVU,HAMZA SADIKI

BONDE LA WAMI RUVU WAJA NA MPANGO WA KUDHIBITI UHARIBIFU WA VYANZO VYA MAJI

Hamida Shariff, Morogoro

KUPUNGUA kwa maji katika vyanzo vya maji vya Bonde la Wami Ruvu, kunasababishwa na shughuli mbalimbali za kijamii kikiwemo Kilimo, ufungaji na uchimbaji madini.

Hayo yalisemwa jana, na kaimu Katibu tawala mkoa wa Morogoro anayeshughulikia miundombinu, Mhandisi Ezron Kilamhama wakati akifungua kongamano la wadau wa maji Bonde la Wami Ruvu lililolenga kujadili mpango wa namna ya kudhibiti uharibifu wa mazingira kwenye vyanzo vya maji katika bonde hilo.

Mhandisi Kilamhama, alisema kuwa kupungua kwa kina cha maji kwenye vyanzo vya maji vya Bonde la Wami Ruvu kunaathiri shughuli za uchumi kwa kuwa rasilimali ya maji inategemewa katika shughuli za Kilimo, ufugaji, viwanda, madini na matumizi ya majumbani hivyo lazima iwekwe mipango na mikakati ya kusimamia vyanzo vya maji.

Alisema kuwa, kwa kutambua umuhimu wa rasilimali za maji, Wizara iliajiri mtaalamu mshauri wa kuandaa mpango shirikishi wa usimamizi na uendelezaji wa rasilimali za maji katika Bonde la Wami Ruvu.

Aidha, alisema kuwa mpango huo unaainisha mahitaji ya wadau mbalimbali wa sekta ya maji kwa kuzingatia wakati uliopo na wakati ujao.

Mhandisi Kilamhama, alisema kuwa  Wizara iliajiri mtaalamu mshauri ambaye anaandaa mpango mkakati wa tathiminj ya athari za mazingira na jamii.

Akieleza athari walizobaini katika tathimini hiyo, muikolojia na mtaalamu wa mazingira, Asukile Kajuni alisema kuwa, athari walizobaini zinatokana na shughuli za kibinadamu, hata hivyo kupitia mipango mikakati athari hizo zinaweza kudhibitiwa. 

Alisema kuwa, kama hakutakuwa na mipango madhubuti, kina cha maji katika Bonge la Wami Ruvu kitaendelea kupungua na hivyo kuathiri shughuli za kiuchumi.

Miongoni mwa wadau walioshiriki kongamano hilo, ni Mkurugenzi wa Halmashauri ya wilaya ya Kilosa, Asajile Mwambambale ambaye alisema suala la ushirikishwaji katika utekelezaji wa mipango hiyo itasaidia kufikia lengo la kutunza vyanzo vya maji.

Mwambambale, alisema kuwa, Halmashauri ya Wilaya ya Kilosa ni moja ya maeneo yenye shughuli za ufungaji, Kilimo na uchimbaji hivyo mpango huo utasaidia kusimamia shughuli hizo ili kudhibiti uharibifu wa mazingira kwenye vyanzo vya maji unaofanywa kupitia sekta hizo.

Mwenyekiti wa bodi ya maji, Bonde la Wami Ruvu,Hamza Sadiki alisema kuwa mpango huo ndio suluhisho la uharibifu wa vyanzo vya maji katika Bonde la Wami Ruvu.