OCODE 'YAPIGA JEKI' MIUNDOMBINU KWA WALEMAVU KIBAMBA

Mkuu wa Shule ya msingi Kibwegere, Charles Kulemo kushoto akitoa maelekezo kwa baadhi ya viongozi wa Shirika la Ocode ambao walifika shuleni hapo kwa ajili ya kuweza kukabidhi miundonbinu ya ya ngazi ambazo waliamua kuzijengwa kwa wajili ya kuweza kuwasaidia wanafunzi ambao ni walemamvu wa viungo.

OCODE 'YAPIGA JEKI' MIUNDOMBINU KWA WALEMAVU KIBAMBA

NA VICTOR MASANGU, KIBAMBA

 

KATIKA kuunga mkono juhudi za serikali ya wamu ya tano katika kuboresha sekta ya elimu na kuwathamini wanafunzi wenye mahitaji maalumu hususan walemavu, Shirika  lisilokuwa la kiserikali la (OCODE ) limekuja na mpango kabambe ambapo limeweza kuwasaidia baaadhi ya wanafunzi wanaosoma katika shule ya msingi Kibwegere iliyopo kata ya Kibamba, kwa kuwapatia vifaa mbalimbali pamoja na kuwajengea miundombinu rafiki ya majengo ili kuwarahisishia katika kutembea.

 

Akizungumza katika hafla fupi, iliyoandaliwa kwa ajili ya kuweza kukabidhi baadhi ya miundombinu ambayo imejengwa kwa ajili ya kuwasaidia watoto hao wenye mahitaji maalumu,  Meneja wa  anayesimamia miradi ya elimu katika Manispaa ya ubungo,  kutoka shirika la Ocode,  Digna Mushi amebainisha kwamba utekelezaji wa mradi huo wa kutoa vifaa pamoja na kuwajengea ngazi utakuwa ni mkombozi kwa wanafunzi hao.

 

“Sisi Kama Shirika la Ocode tumekuwa tukifanya kazi ya mambo ya elimu katika manispaa hii ya Ubungo lengo letu kubwa ni kuhakikisha watoto wetu wanaweza kusoma katika mazingira rafiki, na leo hi tupo katika shule hii ya msingi Kibwegere tumekuja kwa ajili ya kukabidhi miundombinu ya ngazi ambazo zitaweza kutumika kwa wanafunzi mbalimbali ambao ni walemavu wa viungo tofauti kama vile vya mikono pamoja na miguu sambamba pia kuwapatia vifaa vitakavyoweza kuwasaidia,”alisema Digna.

Meneja Misimamizi wa miradi ya elimu katika Manispaa ya Ubungo  kutoka shirika la Ocode,  Digna Mushi wa kushoto akipeana mkono na Mkuu wa shule ya msingi Kibwegere Charles Kulemo  iliyopo kata ya Kibamba ikiwa ni ishara ya kukabidhiwa miundombinu ya ngazi maalumu (hazipo pichani )ambazo zitatumika katika kuwasaidia wanafunzi wenye mahitaji maalumu hususan walemavu wa viungo kuweza kupita kwa urahisi pindi wanapokwenda madarasani.

 

Naye,  Mkuu wa shule ya msingi Kibwegere, Charles Kulemo amesema kwamba wanafunzi wenye mahitaji maalumu katika shule hiyo wapo 15 na kwamba msaada huo wa walioupata kutoka Ocode wa kuwajengea miundombinu rafiki ya ngazi itawasaidia kwa kiasi kikubwa wanafunzi kuweza kutembea kwa urahisi zaidi kwenda madarasani.

 

Mkuu huyo, alibainisha kwamba, shirika la Ocode limeweza kuwa mstari wa mbele katika  kusaidia kwa hali na mali katika kuboresha sekta ya elimu na kwamba msaada huo wa kuwajengea miundombinu ya ngazi kwa wanafunzi wa shule hiyo, kutaweza kuwasaidia kwa kiasi kikubwa wanafunzi ambao walikuwa wanapata shida ya kupanda ili kuelekea madarasani.

 

“Katika shule yetu ya msingi ya Kibwegere kwa sasa tuna wanafunzi 15 ambao wana  mahitaji maalumu na kati yao waluvana wapo tisa na wasichana wapo 6 hivyo kwa msaada huu wa shirika la Ocode la kujenga miundombinu ya ngazi ni jambo ambalo litaweza kuwa mkombozi mkubwa kwa wanafunzi wetu kuweza kupita kwa urahisi kwani hapo awali walikuwa wanapata shida katika suala zima la kupita”Alisema.

Baadhi ya wanafunzi wa shule ya Msingi Kibwegere,Kata ya Kibamba,Manispaa ya Ubungo wakionesha ishara ya heshima kwa wageni kutoka shirika la OCODE (hawapo pichani) katika hafla fupi ya kukabidhi miondombinu kwa wanafunzi wenye mahitaji maalum.

 

Mkuu huyo,katika hatua nyingine, alitoa pongeza kwa Shirika la Ocode kwa kuweza kutoa msaada wa mambo mbalimbali katika shule hiyo ikiwemo kuwajengea madarasa, kuwapatia viti na meza kwa walimu na wanafunzi lengo ikiwa ni kuhakikisha wanaweka mazingira mazuri na rafiki kwao.

 

Kwa upande wake, mmoja wa wakikilishi wa walezi wa watoto hao wenye mahitaji maalumu amebainisha kwamba mjukuu wake anayetambulika kwa jina la Mustafa Sefu mwenye umri wa miaka 10 alikuwa anakabiliwa na changamoto ya viungo vya mikono na miguu lakini kwa sasa anaweza kutembea kutokana na msaada wa vifaa ambao amepatiwa.

 

Hamza Miramboi ni Mwenyekiti wa miradi wa elimu katika manispaa ya Ubungo, alisema kuwa lengo lao ni kuhakikisha kwamba wanaunga juhudi za serikali katika kuboresha sekta ya elimu na kwamba kwa sasa wanaendelea kutoa misaada mbalimbali katika baadhi ya shule za msingi zilizopo Manispaa ya ubungo ikiwemo kuwajengea uwezo wazazi,walezi na wanafunzi katika mfumo wa elimu jumuishi.

 

Shirika lisilokuwa la kiserikali la Ocode limekuwa likiunga mkono juhudi za serikali kwa kipindi kirefu katika kuboresha sekta ya elimu hasa katika shule mbalimbali zilizopo katika Manispaa ya Ubungo kwa kutoa vifaa mbali mbali kwa wanafunzi wenye mahitaji maalumu  ikiwemo madawati, viti, kujenga madarasa pamoja na kutoa elimu jumuishi.