SARAH AWA MISS KITESHE KIBAHA,AHAIDI KUTANGAZA UTALII WA NDANI

 SARAH AWA MISS KITESHE KIBAHA,AHAIDI KUTANGAZA UTALII WA NDANI

Mshindi wa kwanza  aliyeibuka kidedea katika kinyang’anyiro cha wa shindano la kumsaka  miss kiteshe 2020 Sarah Zacharia 23 wa kati kati akiwa katika picha ya pamoja na washindi wa tatu bora, kushoto kwake ni mshindi wa nafasi ya pili Zadia Ally huku kulia kwake mshindi wa tatu Zenat Rajab wakiwa pamoja na viongozi walihudhulia katika shindano hilo.

NA VICTOR MASANGU, KIBAHA

MWANADADA Sarah Zacharia (23) mkazi wa "kwa mathiasi" Wilayani Kibaha Mkoa wa Pwani ameibuka kidedea baada ya kulitwaa taji la kumsaka  miss Kiteshe 2020 huku nafasi ya mshindi wa pili ikianda kwa Zadia Ally (19) na nafasi ya mshindi wa tatu ikinyakuliwa na mwanadada Zenat Rajab.

Kutokana na ushindi huo washindi hao watatu wamepata zawadi mbali mbali kutoka kwa uongozi wa Kiteshe Pub sambamba na kuchaguliwa rasmi kuwa mabalozi ambao watakuwa na jukumu la kutangaza mbuga ya Nyerere National park iliyopo Wilayani Rufiji pamoja na vivutio mbali mbali vinavyopatakana katika eneo hilo.

Mwanadada Sarah Zacharia ambaye ni mshindi wa kwanza katika shindano la miss kiteshe wa kati kati akionyesha ishara ya kumwomba Mungu baada ya kutangwazwa kuibuka kidedea akiwa pamoja na washiriki wengine amabapo kulia kwake ni mshindi wa pili Zenat Rajabu na kushoto kwake ni mshindi wapili Zadia Ally

Katika kinyan’ganyiro cha shindano hilo ambalo lilifanyika mwishoni mwa wiki liliandaliwa kwa ajili ya dhumuni la kuwasaka walimbwende watatu ambao watakuwa na jukumu kubwa la kushirikiana na wadau wengine pamoja na serikali katika kuleta mabadiliko ya kutangaza utalii wa ndani ambao unapatikana katika baadhi ya maeneo katika Mkoa wa Pwani.

Shindaho hilo ambalo liliwashirikisha washiriki wapatao kumi kutoka maeneo mbali mbali lilikuwa na msisimko na ushindano wa aina yake kutokana na warembo wote walikuwa wamejiandaa vilivyo katika staili tofauti na mwonekano mzuri wa mavazi yao ambayo yaliweza kuwavutia mashabiki waliofika katika  eneo hilo la Kiteshe kushuhudia mchuano huo ambao umeweza kuacha historia kwa wakazi wa kibaha.

 Mkurugenzi mtendaji wa Kiteshe Pub kulia aliyeshika kipaza sauti  Fibert Felix akiwa ameambatana na wageni wengine waalikwa  pamoja na washindi watatu akitoa neno shukrani mara baada ya kumalizika kwa shindano hilo ambalo liliwapata warembo watatu kwa ajili ya kuwa mabalozi wa kutangaza utalii wa ndani.

Pia katika shindano hilo warembo hao waliweza kuulizwa maswali mbali mbali na majaji yanayohusiana na masuala mbali mbali ya utalii pamoja na mambo mengine ya kijamii ili kuweza kuona upeo wao katika sekta ya utalii na baadhi yao waliweza kujibu maswali hao kwa umakini hali ambayo iliwafanya mashabiki waliofika kuweza kupiga mayowe kwa shangwe kulingana na majibu yaliyokuwa yakijibiwa na walimbwende hao.

Kwa upande wake, Miss Kiteshe Sarah Zacharia ambaye ametwaa taji hilo alisema kwamba baada ya kuunyakua ushindi huo lengo lake kubwa ni kuhakikisha anajipanga vilivyo katika kuleta mabadiliko katika kutangaza utalii wa ndani ikiwemo pamoja na kutoa fursa  kwa jamii kuwaelimisha umuhimu wa kutembelea mbuga mbali mbali za wanyaama ikiwemo ya Nyerere National Park.

“Kwanza kabisa napenda kumshukuru Mwenyezi Mungu kwa kuweza kunifikisha hapa mpaka nimeweza kuchaguliwa kuwa miss kiteshe kwa mwaka huu wa 2020 lakini ndoto yangu kubwa ambayo ninayo ni kuendeleza kufika mbali zaidi ya hapa katika kutangaza mambo mbali mbali ya utalii wa ndani ukizingatia tuna mbuga nyingi ikiwemo ile ya Nyerere National Park,”alisema Sarah.

                                                Ni Sarah Zakaria(23) katikakati aliyenasa Miss Kitenge-Kibaha,Pwani

Pia alitoa wito kwa washiriki wenzake ambao hawakuweza kupata nafasi ya kuibuka kuwa washindi wasikate tamaa na badala yake wahakikishe wanaendeleza vipaji vyao na fani ya kutangaza utalii wa ndani kupitia fani ya ulimbwende pamoja na kushirikiana vilivyo na watu wengine ili kutimiza malengo waliyojiwekea.

Nao baadhi ya walimbwende wengine ambao walishiriki katika kinyanganyiro hicho  waliweza kutoa shukrani zao za kipekee kwa Mkurugenzi wa kiteshe Pub kwa kuamua kuandaa shindano hilo kwa lengo la kuweza kutangaza utalii wa ndani kupitia fani ya ulimbwende huku wakiiomba serikali kutoa sapoti katika sekta hiyo ili kuweza kufikia malengo waliyojiwekea