TANZANIA YAWEKA MKAKATI SOKO LA KOROSHO AFRIKA

 

Mtafiti wa Magonjwa na Visumbufu vya zao la Korosho Dk Wilson Nene,kutoka  TARI Naliendele,kulia akiwafundisha wakulima wa korosho kutoka wilaya ya Chamwino mkoani Dodoma (kushoto) jinsi ya kubaini na kudhibiti magonjwa yanayoshambulia zao hilo,(PICHA NA ASHTON BALAIGWA,DODOMA)

Na Ashton Balaigwa,Dodoma

TANZANIA imeanza kujipanga kwa ajili ya kuliteka soko la Afrika la korosho kutokana na kuzalishaji  korosho bora kuliko nchi nyingi za Afrika na Duniani.

 Hatua hiyo inatokana na Tanzania  kuwa ndio nchi iliyozifundisha kilimo cha korosho nchi za Afrika ikiwemo  za Ivory Coast na Naigeria, ambazo kwa sasa zinafanya vizuri na  zinaongoza kwa kuzalisha zao hilo Afrika.

Kutokana na hali hiyo sasa Tanzania imeanza mkakati wa kuanza kuongeza uzalishaji wa zao hilo hapa nchini kwa kuwafundisha wakulima wa zao la korosho katika mikoa 17 hapa nchini ili kuliteka soko la hilo kutokana na kuzalisha korosho bora kuliko nchi hizo. 

Mtafiti kutoka Taasisi ya Utafiti wa Kilimo nchini (TARI), Kituo cha Naliendele kitengo cha Agronomia ya Korosho, Kasiga Ngiha, aliyasema  kwenye mafunzo ya wakulima wa korosho kutoka Halmashauri za Kongwa na Mpwampwa mkoani Dodoma.

Alisema takwimu ambazo zimepatikana kutoka mtandao wa Kilimo forum.com zinaonyesha kuwa Tanzania nchi ya nne kwa nchi Afrika kwa kuzalisha korosho ikitanguliwa na Nigeria inayoongoza kwa kuzalisha tani za ujazo laki tisa kwa mwaka ikifuatiwa na Ivory Coast inayozalisha tani za ujazo laki sita.

Alisema nchi ya Tatu kwa kuzalisha Korosho barani Afrika ni Guinea Bissau inayozalisha tani za ujazo laki nne  kwa mwaka ambapo Tanzania inazalisha tani za ujazo laki tatu kwa mwaka.

“Tunajisikia vibaya  kuzifundisha nchi hizi kilimo cha korosho kisha wanakwenda kulima na kuzalisha kwa wingi kuliko sisi, ndio maana sasa tumeamua kusambaza elimu kwa wakulima wetu ili na sisi tuongeze uzalishaji,” alisema Kasiga.

Akitoa elimu ya kilimo bora cha korosho kwa wakulima wa wilaya hizo ,Mtafiti wa Magonjwa na Visumbufu vya zao la Korosho Dk Wilson Nene,alisema sababua inayopelekea kuwepo kwa uzalishaji mdogo wa zao hilo hapa nchini ni pamoja na wakulima wamekuwa wakitumia mbegu za kienyeji.

Alisema  tayari TARI Naliendele wameanza  kuwafundisha wakulima  kutumia mbegu bora za kisasa aina 54  zinazozalishwa na TARI Naliendele zenye uwezo wa kuzalisha mti mmoja zaidi ya kilo 20 tofauti na mbegu za kienyeji zinazotoa kilo 11 .

Alisema  pamoja na hayo wameshawafundisha  njia za kudhibiti magonjwa na visumbufu vya korosho kwa kutumia njia kuu tatu ikiwemo njia ya asili ikiwemo  kufanya usafi katika shamba,kupanda kwa  nafasi na kupunguzia matawi yasiyo faa  ili kusaaidia kutengeneza njia rafiki ya vimelea vingi vinavyoleta athari za magonjwa.

Naye Mratibu wa zao la korosho kutoka TARI Naliendele Dk Geradina Mzena,alisema sasa wamekuja na mikakati mipya ya kutekeleza agizo la Serikali la kuongeza uzalishaji wa zao hilo kutoka tani 315,000 na kufikia tani milioni moja kwa kuwapa wakulima mbinu za kisasa za kilimo hicho pamoja na kutumia mbegu bora za kisasa katika mikoa 17 hapa nchini.