DC Same atafuta ‘Muarobaini’ Wanafunzi waliokwama kuripoti shuleni

 
DC Same atafuta ‘Muarobaini’ Wanafunzi waliokwama kuripoti shuleni

Na Lilian Lucas.

MKUU wa Wilaya ya Same mkoani Kilimanjaro Kasilda Mgeni ameagiza wakuu wa shule kuwasilisha mara moja majina ya wanafunzi ambao bado hawajaripoti shule kwa ajili ya taratibu nyingine za kisheria.

Mkuu wa Wilaya Kasilda, alibainisha  hayo kwa nyakati tofauti alipokuwa kwenye vikao na walimu wakati wa ziara yake kufuatilia mwenendo wa kuripoti kwenye shule walizopangiwa wanafunzi wa kidato cha kwanza wilayani humo.

“Kwenye hili la wanafunzi ambao bado hawajaripoti, wakuu wa shule hakikisheni mnanipatia majina ya wanafunzi wote tuanze ufuatiliaji lazima tujue walipo,”.alisema Kasilda.

 “Binafsi sitaki kabisa kuona tukitajwa vibaya kwenye Elimu, Same inachukua asilimia 40 ya eneo lote la mkoa wa Kilmanjaro kwa ukubwa huo huo lazima tufanye pia makubwa kwenye elimu wakati nahangaika kutafutia suluhu changamoto mlizonazo walimu pia mtimize wajibu wenu”.alisema Kasilda.

Mkuu wa Wilaya ya Same,Mkoani Kilimanjaro,Kasilda Mgeni akiongea na baadhi ya walimu(Hawapo pichani) juu ya mwenendo wa elimu wilayani humo.

Minja Elias ni Mkuu wa Shule ya Sekondari Kwakoko alibainisha mbele ya Mkuu wa wilaya kuwa asilimia kubwa ya wazazi na walezi ni kama wamewatekeleza watoto wao kwani hakuna ufuatiliaji.

“Unakuta mtoto haonekani shule karibia wiki nzima, sisi tunachokifanya siku akija tunamwambia amlete mzazi mzazi haonekani, ukimdadisi sana ndio unakugundua anaishi na Bibi ambae ni mzee sana hata kutembea hawezi , na wazazi wake wanaishi maeneo mengine muda mwingi mtoto anakua ndie mtafutaji”.alisema Minja Elius Mkuu wa shule ya Sekondari Kwakoko.

Akiongea kwa niaba ya Walimu wenzake Minja alisema pamoja na kuwa asilimia kubwa ya wanafunzi kidato cha kwanza wamekwisha ripoti baadhi yao ambao bado hawajulikani walipo ni wale ambao wamekosa ushiriki wa moja kwa moja wa wazazi kwakua huishi na walezi hasa Bibi zao ambao wenyewe pia hawajiwezi.

Mkuu wa Wilaya ya Same,Mkoani Kilimanjaro,Kasilda Mgeni akionea na wanafunzi katika moja ya shule zilizopo katika eneo lake la utawala.

Kwa mujibu wa taarifa ya elimu katika halmashauri ya Wilaya ya Same imebainisha kuwa zaidi ya asilimia 90 ya wanafunzi wa kidato cha kwanza wamekwisha ripoti shuleni,kwamba  mpango wa sasa walionao ni kufuatilia wanafunzi ambao bado hawajaonekana ingawa taarifa za awali zinaonesha wengi wao wamehamishiwa shule nyingine.

Hata hivyo, imebainika kuwa baadhi ya wanafunzi hasa wa shule za Sekondari wilaya ya Same mkoani Kilimanjaro wanalazimika kutumia muda mwingi kwenye shughuli za utafutaji kwa kuelemewa na majukumu ya kutunza familia (Walezi wao) miongoni mwa sababu zinazochangia kudhorota kwa elimu kwakua hakuna ufuatiliaji wa karibu wa wazazi.