MBUNGE VITI MAALUM ATOA MSAADA KITUO CHA WAZEE FUNGAFUNGA MOROGORO

Mhe Bahati Ndingo katikati akifuatilia kwa karibu taarifa ya Kituo cha Fungafunga kutoka kwa ofisa wa ustawi wa jamii, Mwamvita Kilima hayupo pichani wakati akiwasilisha ripoti hiyo kwa niaba ya Afisa Mfawidhi wa Kituo cha Fungafunga cha kuwahudumia wazee wasiojiweza Manispaa ya Morogoro.Kulia kwake ni Mwenyekiti wa Jumuiya ya Wazazi Mkoa wa Morogoro,Heri Hoza  na kushoto kwake ni Katibu wa Mkoa Jumuiya  hiyo,Mkoa wa Morogoro, Zuberi Mtelela(Picha na Severin Blasio) 
Na Severin Blasio,Morogoro

MBUNGE viti maalum, kupitia Jumuiya ya wazazi ya Chama cha Mapinduzi, Bahati Ndingo amesema serikali ya awamu ya tano inayoongozwa na Rais Dk. John  Magufuli itaendelea kutatua changamoto zinazo wakabili wazee kwa ajili ya ustawi afya zao.

Mbunge Bahati akizungumza na Wazee wa Kituo cha Fungafunga kilichopo Manispaa ya Morogoro wakati wa ziara yake kituoni hapo alisema kuwa Wazee ni hazina hivyo serikali kamwe haitawatupa  kwa kuwa wakati wa ujana wao walitoa mchango mkubwa katika kujenga taifa hivyo wanapaswa kuhudumwia kikamilifu.

“Hawa wazee ni baraka kuwa na sisi kama Jumuiya ya wazazi tutafikisha kero zenu serikalini ili ziweze kufanyiwa kazi na changamoto zile zilizopo kwenye uwezo wetu tutaendelea kuzitatua”Alisema

Mhe.Bahati Ndingo akikabidhi sehemu ya msaada wa chakula na mahitaji mengine ya kibinadamu katika Kituo cha Wazee cha Fungafunga kilichopo Manispaa ya Morogoro.

Katika ziara hiyo mdaku alitoa msaada wa vyakula mbalimbali ikiwemo mchele mafuta ya kula sukari na sabuni.

Akipokea msaada huo kwa niaba ya Ofisa Mfawidhi wa kambi hiyo ofisa wa ustawi wa jamii, Mwamvita Kilima alishukuru mbunge huyo kwa msaada alioutoa.

Kilima aliwataka wadau wengine kuiga mfano huo na kwamba  wakumbuke kuwa nao ni kundi la wazee watarajiwa hivyo wanahitajika kutoa huduma za karibu mara kwa mara ikiwa ni moja ya hatua ya kuunga mkono serikali ya awamu ya tano.

Hata hivyo, Kilima alitoa changamoto zinazoikabili kambi hiyo kuwa pamoja na barabara ,uzio,bwalo la chakula na magodoro.

Akiongea kwa niaba ya wazee wenzake,  Mzee Joseph Kaniki alishukuru serikali ya awanu ya tano kwa kuwajali wazee na kwamba wazee hao wanamwombe dua Rais wa Jamhuri ya Muungano wa Tanzania, aweze kutekeleza majukumu yake vizuri akiwa na afya njema.