BIL 298 KUTENGWA PWANI MIRADI YA MAENDELEO,MISHAHARA

 

BIL 298 KUTENGWA PWANI MIRADI YA MAENDELEO,MISHAHARA

NA VICTOR MASANGU ,PWANI

KIKAO maalumu cha kamati ya Ushauri ya Mkoa wa Pwani kimeazimia kwa pamoja kupitisha kiasi  cha zaidi ya shilingi bilioni 298  kwa kipindi cha mwaka wa  fedha 2021/2022 ambacho kimeombwa  kwa ajili ya utekelezaji wa majukumu yake mbalimbali ikiwemo mishahara ya watumishi pamoja na ujenzi wa miradi ya maendeleo.

Hayo yamebainishwa na Mchumi wa Mkoa wa Pwani, Gerald Mbosoli wakati akisoma taarifa ya mapendekezo wa mpango wa bajeti ya mwaka wa fedha kwa kipindi cha 2020 /2022 ambapo kilihudhuriwa na viongozi mbalimbali wa serikali,viongozi wa dini ambao kwa pamoja waliweza kuiunga mkono bajeti hiyo kwa asilimi 100 ambayo itakwenda kuleta chachu ya maendeleo.

Alibainishwa kwamba, kiasi hicho kilichoombwa kinaongezeka kwa kiasi cha asilimia 9.38 ikilinganishwa na bajeti inayoendelea kutekelezwa na kwamba maeneo ambayo yameongezeka ni katika matumizi mengineyo katika sekretarieti ya Mkoa ikiwemo upande wa mishahara ya  halmashauri pamoja na mapato ya ndani.

Aidha, Mchumi huyo  wa Mkoa, alisema kwamba, licha ya bajeti hiyo  kupitishwa  kwa kishindo na wajumbe lakini kumekuwepo na baadhi ya chanangamoto katika suala zima la mianya ya utoroshaji wa mapato kutokana na uwepo wa bandari bubu pamoja na njia ambazo sizizo rasmi.

Pia,  alisema kwamba, sababu ambazo zinapelekea kutofikia malengo katika ukusanyaji kwa baadhi ya halmashauri  ni kushindwa kukusanya ushuru wa madini ya ujnenzi pamoja na baaadhi ya wananchi wengine kutokuwa tayari kwa ajili ya kulipia kodi na ushuru wa hiari.

Kwa Upande wake, Mkuu wa Mkoa wa Pwani, Mhandisi Evarist Ndikilo amesema kwamba mpango wa bajeti hiyo  pindi itakapotishwa Waziri mwenye dhamana itakwenda kuleta mabadiliko chanya zaidi kwa wananchi  katika suala zima la  kimaendeleo na kwamba ana matumaini makubwa  ya mapendekezo hayo ya bajeti yataweza kuwa ni mkombozi katika kuhudumia wananchi.

Mhandisi Ndikilo, ameziomba halmashauri zote tisa za Mkoa wa Pwani kuhakikisha kwamba wanaweka mipango madhubiti ya kuweza kubuni vyanzo vipya vya mapato ambavyo vitaweza kuwasaidia kwa kiasi kikubwa katika kuongeza pato kuliko kutegemea chanzo kimoja katika suala zima la ukusanyaji wa mapato.

“Kitu kikubwa ninachowaomba wakurugenzi wa halmashauri zote tisa zilizopo Mkoa wa Pwani, ni lazima sasa tuweze kupambana zaidi katika ukusanyaji wa mapato maana kuna baadhi ya halmashauri hapa bado hazijatimiza malengo ambayo yamewekwa na serikali naona nyingi bado zipo chini ya asilimia 50 na chache tu ndio zimeweza kuvuka juu ya asilimia 50.”alifafanua Ndikilo.

 Dr. Delphine Magere ni Katibu Tawala wa Mkoa wa Pwani kwa upande wake, alisema kwamba katika kipindi cha mwaka wa 2021/2022 mkoa wa Pwani utakuwa ni vipaumbele vipatavyo tisa ikiwemo kuhakikisha kwamba inasimamia hali ya ulinzi na Usalama, kusimamia utekelezaji wa mkakati wa Taifa dhidi ya mapambano dhidi ya rushwa.

Kadhalika aliipongeza serikali ya ya awamu ya tano kwa kuweza kutatua baadhi ya chagamoto ikiwemo kutekeleza ujenzi wa bandari ya Nyamisati, Kivuko cha kisasa cha Mv- Kilindoni, kutoa magari 11 kwa ajili ya wakuu wa Wilaya pamoja na makatibu Tawala wa Wilaya ambayo yameweza kuwa mkombozi mkubwa katika utekelezaji wa makukumu ya ya ya kuwatumikia wananchi.

Alivitaja vipaumbele vingine, kuwa ni kusimamia utekelezaji wa shughuli  za masuala ya mtambuka VVU, ukimwi , magonjwa  yasiyo ya kuambukiza, lishe pamoja na mabadiliko ya tabianchi, ikiwemo pamoja na kuimarisha usimamizi na ufutatiliaji wa ukusanyaji wa mapato, pamoja na kuweza kubuni vyanzo vipya vya mapato vya ndani katika halmashauri husika.

Kadhalika, alifafanua kwamba vipaumbele vingine, vitakuwa ni uandaaji wa mazingira ya uwezeshaji kwa ajili ya uwekezaji na ujenzi wa viwanda mbali mbali, pamoja na uboreshaji wa miundombinu katika sekta ya elimu  pamoja na afya, pamoja na kutilia mkazo zaidi katika sekta ya kilimo mifugo pamoja na masuala ya uvuvi.

Katika hatua nyingine jambo lingine ni kuhakikisha wanasimamia stahiki za watumishi ikiwemo pamoja na ulipaji wa madeni lengo ikiwa ni kuwapa molali zaidi ya watumishi waweze kufanya kazi kwa weledi ambao unatakiwa kwa kuzingatia msingi ya kazi iliyowekwa.

Nao baadhi ya wajumbe waliohudhuria katika kikao hicho walitoa pongezi kwa uongozi mzima wa Mkoa wa Pwani kwa kuweza kuweka vipaumbele ambavyo vitaweza kuwasaidia wananchi wanyonge na kwamba mapendekezo hayo ya mpango wa bajeti yatasaidia kutatua changamoto zinazowakabili katika suala la huduma za kijamii sambamba na kuwapatia  watumishi stahiki zao.