RAS MOROGORO AZITAKA TAASISI KUSOGEZA HUDUMA KWA WANANCHI

Katibu Tawala Mkoa wa Morogoro,Mhandisi Emanuel Kalobelo

Na Andrew Chimesela

KATIBU Tawala Mkoa wa Morogoro Mhandisi Emmanuel Kalobelo amezitaka Taasisi za Umma Mkoani humo  kuwasogezea karibu huduma Wananchi wa Halmashauri ambazo zimeazisha makao mapya hivi karibuni ili kuwaondolea kero wananchi hao.

Mhandisi Kalobelo ametoa agizo hilo leo Oktoba 19 wakati wa Kikao na Wakuu wa Taasisi hizo kilichofanyika katika Ukumbi wa Mikutano wa Ofisi ya Mkuu wa Mkoa kwa lengo la kufahamiana na kuwakumbusha wajibu wao katika kuwahudumia wananchi kulingana na Taasisi zao.

Kiongozi huyo ambaye ndiye Mtendaji Mkuu wa Serikali ngazi ya Mkoa amesema kuna Halmashauri katika Mkoa wa Morogoro ambazo zimeanza makao yao mapya hivi karibuni ambazo wananchi wake wanahitaji huduma  kwa karibu zaidi hivyo kuzitaka Taasisi ambazo hazijapeleka huduma kwenye halmashauri hizo kufanya hivyo.

“Ningependa kuwakumbusha wajibu wetu kama Taasisi za Umma ndani ya Mkoa wa Morogoro umuhimu wa kuhamia kwenye Makao mapya ya kiutawala ndani ya Mkoa huu. Mtakumbuka kwamba Serikali kwa nyakati tofauti tofauti imekua ikianzisha maeneo mbalimbali ya kiutawala ndani ya Mkoa wa Morogoro”

Akifafanua zaidi Mhandisi Kalobelo amezitaja Halmashauri ambazo zinahitaji wananchi wake kusogezewa huduma kwa karibu zaidi kutoka Taasisi mbalimbali ni pamoja na Malinyi, Mlimba yenye makao yake makuu  Mngeta na Morogoro vijijini ambapo Makao makuu yake yako Mvuha.

Aidha, Mhandisi Kalobelo amezitaka Taasisi hizo kuongeza jitihada katika kutatua kero za Wananchi kwa wakati na kwa lugha yenye staha huku akikumbushia agizo lake la kutaka lijengwe jengo moja (One Stop Centre) ambalo Wawakilishi wa Taasisi mbalimbali watafanyia kazi humo ili kurahisisha upatikanaji wa vibali mbalimbali katika sehemu moja.

Sambamba na agizo hilo amezikumbusha Taasisi hizo kuweka mazingira mazuri kwa wawekezaji mbalimbali wanaotaka kuwekeza ndani ya Mkoa huo huku akibainisha kuwa baadhi ya Taasisi zimekuwa kikwanzo kwa wawekezaji wanapojitokeza kuwekeza hivyo amewataka kubadilika na kuiunga Mkono Serikali katika kukuza Uchumi wa nchi.

Kwa upande wake, Kaimu Katibu Tawala Msaidizi anayeshughulikia Serikali za Mitaa Leopold Ngilwa amesema agizo la Katibu Tawala  wa Mkoa kwa Taasisi za Umma limekuja kwa wakati muafaka maana changamoto kwa maeneo yalioanzishwa bado ni kubwa , na sehemu nyingi kama Halmashauri ya Wilaya ya Morogoro Mlimba na bado hawajapata huduma muhimu kama kibenki, TANESCO, TCCL na  kusababisha kero kwa wananchi wa maeneo hayo.

Naye,Frazina Gwimo amesema kikao hicho kimesaidia wao kama Taasisi za Umma Mkoani humo kufahamiana wao kwa wao na wametambua  namna ya Utendaji kazi wa  Taasisi kuhakikisha inashirikiana na Ofisi ya Mkuu wa Mkoa ili kuweza kutatua changamoto za Wananchi wa Mkoa kwa ukaribu zaidi  badala ya kufikisha  kero zao moja kwa moja Ofisi ya Mkuu wa Mkoa.

Naye, Kiongozi wa Huduma ya Misitu Tanzania - TFS Wilaya ya Malinyi Kamanda Amari Mramba amesema kupitia kikao hicho wameweza kufahamiana na wengine  na wamekumbushwa kushirikiana na Taasisi nyingine na katika shughuli zao za Uhifadhi kufanya kazi kwa karibu na Ofisi ya Mkuu wa Mkoa .

Hatua ya Katibu Tawala huyo kuitisha kikao hicho imekuja baada ya kuwepo kwa msongamano wa wananchi wengi kupeleka moja kwa moja kero zao katika Ofisi ya Mkuu wa Mkoa