RC PWANI ACHUKIZWA NA WALIMU WA SEKONDARI WASIOWAJIBIKA

 

MKUU WA MKOA WA PWANI,MHANDISI EVARISTI NDIKILO AKITOA MSISITIZO WA UWAJIBIKAJI KWA WALIMU WA SEKONDARI MKOA WA PWANI

RC PWANI ACHUKIZWA NA WALIMU WA SEKONDARI WASIOWAJIBIKA

NA VICTOR MASANGU, PWANI  

MKUU wa Mkoa wa Pwani, Mhandisi Evarist Ndikilo amewaagiza wakuu wote wa shule za sekondari kubadilika na kuhakikisha wanaweka mipango madhubuti  ambayo itaweza kuongeza kasi ya ufundishaji ili  kuboresha  sekta ya elimu  na kusaidia kasi ya  kiwango cha ufaulu iweze kuongezeka hasa katika shule za serikali

Pia, Mkuu huyo wa Mkoa ameonesha kuchukizwa na tabia ya baadhi ya walimu kutotekeleza majukumu yao ya kazi hali ambayo ina viashiria vya uzembe na kushusha kiwango cha ufaulu kwa wanafunzi.

Ndikilo ametoa kauli hiyo wakati wa kufungua kikao kazi ambacho kimewakutanisha wakuu wa shule za sekondari za serikali wapatao 85 kutoka Wilaya zote za Mkoa wa Pwani kwa lengo la  kujadili mikakati madhubuti ambayo itasaidia kuinua   kiwango cha elimu  kwa wanafunzi na kuwataka wakuu wote wa shule kulivalia njuga suala hilo na kuwachukulia hatua kali walimu ambao ni wazembe.

Aliongeza kwamba lengo la serikali ya Mkoa wa Pwani ni kuhakikisha kwamba inaweka mipango madhubuti kwa ajili ya kuongeza kasi zaidi kwa wanafunzi wanaosoma katika shule mbalimbali za serikali hivyo walimu wote wanapaswa kuongeza juhudi zaidi katika kutilia mkazo suala zima la kuwafundisha wanafunzi ili waweze kufanya vizuri katika  masomo yao.

“Mimi kama Mkuu wa Mkoa wa Pwani huwa nashangaa sana kuona katika shule zingine zinafanya vizuri na zingine zinafanya vibaya kwa hivyo rai yangu na maagizo kwa wakuu wote wa shule za sekondari ambazo ni za serikali lazima sasa mhakikishe mnawafuatilia kwa ukaribu walimu wote ambao ni wazembe katika ufundishaji maana haiwezekani mwalimu anapokea mshahara lakini katika kuwafundisha wanafunzi hafanyi hivyo hii sio sahihi hata kidogo,”alisema Ndikilo.

Aidha, Ndaikilo aliongeza kuwa  ili wanafunzi wa shule za serikali waweze kufanya vizuri katika mitihani yao mbalimbali ya Taifa inatakiwa kuwe  na ushirikiano wa karibu baina na walimu wakuu pamoja na walimu wa kawaida katika suala zima la kuweza kuwaandaa mapema wanafunzi ili wanapoingia katika mitihani yao wanakuwa wameshajiweka katika maandalizi mazuri.

Katika hatua nyingine Ndikilo aliwapongeza walimu wakuu hao wa shule za sekondari za serikali kwa kuweza kujitahidi kwa hali na mali kuongeza kiwango cha ufaulu mwaka hadi mwaka na kuwataka waendelee na moyo  wa kuongeza juhudi na maarifa ili Mkoa wa Pwani uweze kuingia katika tano bora katika ngazi ya Taifa.

Kwa upande wale Afisa elimu wa Mkoa wa Pwani,  Khadija Mcheka  amesema kwamba licha ya kiwango cha elimu ya sekondari kuongezeka  kwa asilimia 85.8  ukiringanisha na miaka iliyopita lakini bado kuna changamoto katika sekta hiyo ikiwemo ya  miundombinu ya majengo ya madarasa, pamoja na  uhaba wa vitendea kazi ambavyo vinahitajika ili kuboresha sekta ya elimu.

KATIBU TAWALA MKOA WA PWANI DKT.DELPHINE MAGERE AKITOA UFAFANUZI UMUHIMU WA KIKAO KAZI ALICHOKIITISHA NA KUHUDHURIWA NA WALIMU WAKUU 85 WA SHULE ZA SEKONDARI

Naye, Katibu Tawala wa Mkoa wa Pwani Dk. Delphine Magere ambaye ndiye aliyeitisha kikao kazi hicho alibainisha kwamba dhumuni kubwa ni kuwakutanisha wakuu wote wa shule hizo za sekondari za serikali ni  kujadili changamoto zilizopo katika sekta ya elimu ili kuzitafutia ufumbuzi na kuweka mbinu zitakazosaidia  kuongeza kiwango cha elimu.

 Dk. Magere aliongeza kuwa ana imani kikao kazi hicho kati ya walimu wakuu kitaweza kuleta chachu zaidi ya kukuza kasi ya maendeleo katika sekta ya elimu na kwamba katika siku zijazo wanatarajia wanafunzi wanaosoma katika shule mbalimbali za serikali wataweza kufanya vizuri zaidi tofauti na miaka iliyopita.

“Hiki kikao nimekiandaa kwa lengo la kukutana na walimu wakuu wa shule mbalimbali za serikjali na hapa wamekuja walimu wapatao 85 kwa hivyo ni imani yangu tutaweza kufikia malengo ambayo tumejiwekea ya Mkoa wetu wa Pwani kuingia katika nafasi ya tano bora kitaifa na hili sisi tunaliweza endapo tukishikamana kwa sasa utaona ufaulu wetu kwa shule za sekondari umeongezea hadi kufikia asilimia 85 na tutaendelea na kasi hii.”alisema Dk. Magere.