BILIONI 185 KUMALIZA KERO YA MAJI MOROGORO MJINI-ABOOD

 

Bwa.AbdulazizAbood Mgombea nafasi ya Ubunge,
Jimbo la Morogoro Mjini.

Bw.Abdulaziz Abood Mgombea nafasi ya ubunge,Jimbo la Morogoro Mjini

Na Ashton Balaigwa,MOROGORO

MGOMBEA wa nafasi ya  Ubunge Jimbo la Morogoro mjini kwa tiketi ya  Chama cha Mapinduzi (CCM) Abdulaziz Abood ,amesema anapaswa kuchachuliwa kwa mara nyingine kwakuwa amefanikiwa kuibana Serikali na kupelekea  Rais Dk John Magufuli kutoa fedha zaidi ya Shilingi  bilioni  185  kwa ajili ya kuhakikisha kero ya maji  inamalizika  Manispaa ya Morogoro.

Kutokana na hali hiyo  ameaomba wananchi wa jimbo hilo wenye sifa za kupiga kura kujitokeza kwa wingi  Oktoba 28, mwaka huu(2020)  kuwachagua wagombea waliosimamishwa na  chama hicho kuanzia ngazi ya Rais, Ubunge na Madiwani ili waendelee kuwaletea maendeleo endelevu.

Kwa kipindi kirefu sasa wakazi wa Manispaa ya Morogoro wamekuwa wakikabiliwa na changamoto ya maji katika maeneo yao.

Abood , alisema hayo  wakati wa  uzinduzi wa kampeni ya  uchaguzi ya chama hicho wilaya ya Morogoro mjini   kwenye uwanja wa Shujaa uliopo kata ya Mji Mpya , Manispaa ya Morogoro.

Katika uzinduzi huo  mgeni rasmi alikuwa ni Mwenyekiti wa CCM Mkoa huo, Innocent Kalogeris   ambaye pia ni mbunge mteule wa Jimbo la Morogoro Kusini kupita chama hicho.

“ Nimekuja kwenu kuomba mnipe tena ridhaa yenu ya kuwaongoza miaka mingine mitano ili niweze kuendelea na kazi zilizobaki  na kazi kubwa ambayo nina ijua ni kero kubwa katika mji wa Morogoro ni suala la  maji ambalo tayari serikali imeshaanza kutoa hela” alisema Abood.

Alisema kuwa katika kuondoa kero hiyo,tayari Rais Dk Magufuli,ameweza kutoa kiasi cha shilingi bilioni 185  kwa ajili ya  mradi huo, kwamba, wakati wowote  utaanza  kwenye  maeneo mbalimbali ikiwemo  kata za Bigwa, Mkundi , Lukobe , Mindu na Kingolwira.

 Alisema kwa  kipindi cha miaka kumi ya ubunge amekuwa si mbunge  wa maneno maneno bali ni wa  vitendo zaidi kwa ajili ya kuleta maendeleo endelevu ya wananchi  ,na kwamba chini ya Serikali ya iliyopo madarakani  Maniapaa ya Morogoro imesonga mbele kimaendeleo .

Hata hivyo, alisema  chini ya Serikali imeweza kutekeleza  miradi mingi ya maendeleo  katika Manispaa ya Morogoro  ikiwa na  uboreshaji wa huduma za afya , elimu na miundombinu ya barabara ,umeme  na huduma za kijamii ikiwemo utoaji wa mikopo kwa wanawake , vijana na watu wenye ulemavu.

Hivyo, alitumia fursa hiyo kuwaomba  wananchi  wa   Manispaa hiyo wenye sifa za kupiga kura kujitokeza siku ya upigaji kura  Oktoba 28, mwaka huu  na kumpigiaakura zote mgombea urais wa CCM , Dk John Magufuli .

Jimbo la Morogoro Mjini lina jumla ya kata 29,ambapo kwa upande wa Chama cha Mapinduzi(CCM) wameweza kuweka wagombea wote baada ya Tume ya Uchaguzi kuwapitisha kugombea nafasi hizo.