ZAO LA KOROSHO KUSTAWISHWA MOROGORO-TARI

 

Taasisi ya Utafiti wa Kilimo Tanzania (TARI)

Na Ashton Balaigwa,MOROGORO

SERIKALI kupitia Taasisi ya Utafiti wa Kilimo Tanzania (TARI) Imeanza mkakati wa kulifufua zao la korosho katika Mkoa wa Morogoro ili kulifanya zao hilo kuwa moja ya zao la biashara litakalosaidia kukuza uchumi wa mkoa huo. 

Kupitia mkakati huo TARI Naliendelea iliyopo  mkoani Mtwara imeanza sasa kutoa mafunzo kwa wakulima wa zao hilo la korosho kwa mkoa wa Morogoro ili kuwapatia mbinu bora za ulishaji wa zao hilo la korosho .

Hivi karibuni wakulima wa zao la korosho wamekuwa wakiendesha shughuli zao za kilimo katika mfumo wa mazoea badala ya kuendesha kibiashara.

Mratibu wa zao la korosho kutoka TARI Dk Geradina Mzena,alisema lengo kuu ni kutaka kumuondoa mkulima kutoka katika kilimo cha kujikimu na kuanza sasa kulima kilimo cha biashara  kwa kuwajengea uwezo wakulima wa zao hilopamoja na maafisa ugani. 

Dk Mzena alisema kuwa ili kwakua Morogoro ina wakulima wapya na lengo ni kukifanya kilimo hicho cha korosho kuwa cha kibiashara ni lazima kuwapatia mafunzo ya namna ya kutunza zao hilo la korosho pamoja na changamoto mbalimbali za kilimo hicho. 

“ Tunatambua Hii ni mikoa mipya yenye wakulima wa zao la korosho hivyo tumeona kuwa tuwapatia mafunzo ya kilimo bora cha zao la korosho  ili waweze kulima kilimo cha kibiashara”Alisema Dk Mzena.

Mmoja wa wakulima wa zao hilo,Neema Marwa kutoka wilayani Mvomero,alisema ameamua kuanza kulima kilimo hicho cha korosho,baada ya kuhamasika na kuwa na uwakika wa soko lake ukilinganisha na kilimo cha mazao mengine ya biashara.

Naye Martini Joseph mkazi wa Morogoro vijijini,alisema kuwa anaishukuru serikali kwa kuamua kutoa mafunzo ya kilimo hicho cha korosho ambacho kimekuwa na gharama nafuu na chenye kuleta tija na mafanikio kwa haraka tofauti na kilimo kingine.

Akifungua mafunzo hayo,Katibu Tawala Msaidizi anayeshughulikia Uchumi na Uzalishaji,Rosaria Rwegesira,alisema kuwa kwa miaka ya nyuma mkoa wa Morogoro ilikuwa miongoni mwa mikoa inayolima zao hilo lakini kutokana na kutokuwa na soko la uwakika wakulima walikata tamaa.

Alisema kutokana na hamasa katika miaka ya hivi karibuni wakulima wameamua kuanzisha kilimo hicho ambapo mwaka 2018 zilipatikana jumla ya tani 63 na mwaka 2019 ziliongezeka na kufikia tani 183 hivyo kupitia mafunzo hayo uzalishaji huo utaendelea kuongezeka na kuwa  miongoni mwa mikoa ambayo inazalizalisha korosho.