WADAU WA KILIMO WATAKIWA KUWAJENGEA UWEZO WAKULIMA WADOGOWADOGO

Irene Liborious, Afisa Mradi wa mtandao wa wakulima Afrika Mashariki na kusini mwa Afrika(ESAFF)

WADAU WA KILIMO WATAKIWA KUWAJENGEA UWEZO WAKULIMA WADOGOWADOGO

Thadei Hafigwa

MADIWANI na wadau wa Kilimo wametakiwa kuwa na mtazamo wa haki za binadamu na kushiriki katika mchakato wa maendeleo kwa kuzingatia Katiba ya Jamhuri ya Muungano wa Tanzania,miongozo ya tamisemi,fursa na vikwazo na uundaji wa bajeti ikiwa ni njia ya kuwasaidia wakulima wadogowadogo kupata mafanikio chanja katika shughuli zao za Kilimo.

Wakiwasilisha mada kwa nyakati tofauti,katika mafunzo wa madiwani na wadau wa kilimo wilaya ya Mvomero mkoa wa Morogoro,Venance Mlali na Dk.Albinie Marcossy walieleza kwamba nafasi ya madiwani ni kubwa katika kutatua changamoto zinazowakabili wakulima katika kupata maendeleo kwenye sekta ya kilimo.

Venance Mlali wa Asasi ya Mafiga women alisema kuwa ili mkulima mdogomdogo aweze kupata haki yake hapana budi kuzingatia malengo ya kimataifa kwa kuzingatia lengo namba moja na namba mbili ambapo imeweka bayana haki za binadamu kushiriki kwenye mchakato ya maendeleo kwa kuzingatia katiba ya nchi.

Zao la ndizi ni moja kati ya mazao yanayozalishwa na wakulima wadogowadogo nchini Tanzania.

“Kiini cha yote ni mfumo wa uwajibikaji ili kupata matokeo chanja kwenye sekta ya kilimo kujua bajeti za halmashauri ambao ndio msingi wa kufanikisha katika kukabiliana na umaskini na njaa”Alisema.

Kwa upande wake,Dk.Albinie Marcossy alisema kuwa mpango wa maendeleo ya taifa na program ya miaka mitano ya kuendeleza sekta ya kilimo awamu ya pili ambapo maeneo mahususi katika mfumo wa utekelezaji na ufuatiliaji kuanzia ngazi ya kijiji hadi ofisi ya waziri mkuu umebebwa na msingi wa uwajibikaji wa jamii,viongozi wa umma wakiwemo madiwani.

Mafunzo hayo kwa madiwani yameandaliwa na mtandao wa wakulima wadogowadogo Tanzania(MVIWATA) kwa kushirikiana na mtandao wa wakulima  Afrika Mashariki na kusini mwa Afrika(ESAFF)

Irene Liborius,Afisa mradi wa ESAFF amesema kuwa madiwani katika masuala ya uwajibikaji na ushiriki wa wakulima katika sekta ya kilimo ni suala mtambuka katika utekelezwaji nchini Tanzania kwa kuzingatia mipango ya kimataifa na Afrika (CAADP) kuhusu usalama wa chakula.

Aidha,Mwakilishi kutoka Mtandao wa wakulima wadogowadogo Tanzania (MVIWATA), Theodora Pius alisema kuwa  Mviwata imekuwa ikiwasogezea wakulima wadogowadogo huduma kwa msingi ya ushawishi na utetezi kwa kufanikiwa kujenga soko la nyandira,kutoa mafunzo kwa wakulima ili kuendesha kilimo chenye tija.

Soko la Nyandira,Wilaya ya Mvomero, Mkoa wa Morogoro ni miongoni mwa masoko yaliyotokana na juhudi za mviwata

Theodora alisema kuwa kwa mwaka 2020 mviwata kupita uanachama wake na taasisi ya ESAFF imefanikiwa pia kuendesha mafunzo kwa wanachama wake kwa kuwashirisha  viongozi wa serikali, kupitia mfumo shiriki ambao umeleta mfanikio makubwa wanayojivunia.