WAZIRI KALEMANI: WATANZANIA WANAJINYANYAPAA KUINGIZA UMEME MAJUMBANI

WAZIRI KALEMANI: WATANZANIA WANAJINYANYAPAA KUINGIZA UMEME MAJUMBANI

Lilian Lucas, Morogoro

WAZIRI wa Nishati Dk Medard Kalemani amesema watanzania wengi wamekuwa wakijinyanyapaa wenyewe katika suala zima la kuingiza umeme kwenye nyumba zao.

Waziri Dk kalemani alisema hayo jana wakati wa Uzinduzi wa kusambaza Umeme Vijijini Awamu ya tatu Mzunguko wa Pili kimkoa uliofanyika kitongoji cha Muheza Ititu wilayani Gairo.

Alisema kwa sasa Serikali inamtaka kila mtanzania mwenye nyumba popote alipo atumie umeme, na kwamba imeendelea kuhamasisha kuingiza umeme majumbani bila kujali aina ya nyumba.

“Gharama za kuingiza umeme kwa wananchi kwa sasa imepunguzwa kwenye maeneo yote ni sh 27,000 sasa unashindwaje kuingiza umeme, umeme sasa ni lazima kwa kila mtanzania na si jambo la hiari,”alisema waziri Dk Kalemani.

Aidha waziri huyo alisema Serikali haitaacha eneo hata moja  kufikisha umeme kwani kazi ya umeme ni kuongeza thamani ya mazao na kwenye Kilimo umeme una kazi kubwa ikiwemo usindikaji  wa mazao hivyo viwanda vinatakiwa kuanzishwa kwa wingi.

Waziri Dk Kalemani aliwataka wananchi hususani vijana kuchangamkia fursa ya uwepo wa umeme kwenye maeneo yao kwa kuanzisha biashara na kilimo kwa kuongeza thamani ya mazao.

Akizungumza na wananchi wa kitongoji cha Muheza Ititu kijiji cha Kisitwi kata ya Rubeho wilayani Gairo alisema mpaka kufikia Desemba Mwaka 2022 Tanzania itaandika historia kwa vijiji vyote kupata umeme na kuungana na mataifa mengine.

“Mpaka sasa vijiji 10,312 vina umeme na vilivyobaki ni 1,956 ambavyo vitapelekewa katika awamu hii mzzunguko wa pili, kwa Morogoro vijiji vyenye umeme ni 440 kati ya 673,”alisema.

Alisema kwa kutambua umuhimu wa Umeme Serikali imetenga takribani sh 66.8 bilioni kwa mkoa wa Morogoro ili kuhakikisha vijiji 233 vilivyosalia vinapatiwa umeme.

Mmbunge wa Jimbo la Gairo Ahmed Shabiby alisema pamoja na Waziri huyo kufika katika wilaya hiyo zaidi ya mara saba, alimuomba Waziri Dk Kalemani kuleta Gari la meneja wa shirika la Umeme (TANESCO) wilaya ya Gairo ili aweze kutembelea maeneo korofi ambayo yamekuwa kufikika kwa taabu.

Aidha Shabiby alimuomba waziri huyo kuvifikia vijiji kwenye halmashauri nyingine ambazo vijiji vyao havijafikiwa ili mkoa wote wa Morogoro uweze kuwa na umeme na kuweza kuzalisha kwa wingi mazao mbalimbali.

Mkuu wa Mkoa wa Morogoro Martine Shigela alisema kukosekana kwa umeme kunachangia uzalishaji wa mazao kuwa mdogo, hivyo upatikanaji wa umeme kutaongeza uanzishwaji wa viwanda kwenye wilaya.

Shigela aliwataka wataalamu kwenye halmashauri za wilaya kutenga muda wa kuwatembelea wananachi pindi umeme unapopelkwa kwenye maeneo ya wananchi kwani kuwepo kwa umeme kunaleta tija.