KIBAHA YATOA MIL 312 MKOPO ISIYO NA RIBA KWA MAKUNDI MAALUM

 

MBUNGE WA JIMBO LA KIBAHA MJINI(KATIKATI MWENYE SUTI NYEUSI),SILVESTRY KOKA AKIKABIDHI MFANO WA HUNDI KWA WAWAKILISHI WA VIKUNDI VYA VIJANA,WANAWAKE NA WALEMAVU KWA AJILI YA MKOPO USIYO NA RIBA ULIOTOLEWA NA HALMASHAURI YA MJI WA KIBAHA KUTOKA MAKUSANYO YAKE YA NDANI

KIBAHA YATOA MIL 312 MKOPO ISIYO NA RIBA KWA MAKUNDI MAALUM

HALMASHAURI ya mjini Kibaha iliyopo mkoani Pwani imetoa kiasi cha  shilingi  milioni 312  kwa ajili kuviwezesha vikundi  vya vijana,wanawake na walemavu ikiwa ni kutekeleza maagizo  ya serikali ya kutenga asilimia 10 katika makusanyo ya ndani kwa ajili ya kuwapatia mikopo  ambayo  haina  riba kwa  makundi hayo.

 Kaimu Mkurugenzi wa halmashauri ya mji Kibaha George Mbogo alibainisha kuwa kwa kipindi cha mwaka 2020 /2021  kupitia idara ya maendeleo ya jamii imeweza kuhamasisha wananchi kuunda vikundi vya kijamii ambapo jumla ya vikundi 327 kutoka katika kata 14 viliweza kuundwa na kusajiliwa.

Kaimu mkurugenzi huyo alifafanua kuwa Halmashauri ya mji KIbaha imeweza kujenga kituo cha biashara kwa wanawake wajasiriamali kilichopo kwenye soko la mnarani pamoja na eneo maalumu la kuuzia kuku kwa madhumuni ya kuinua zaidi biashara zao kwa kuanzisha mitandao yao.

Makamu Mwenyekiti wa halmashauri ya mji Kibaha Selina Wilson alibainisha kwamba pamoja na mafanikio hayo lakini bado kuna changamoto  ya ucheleweshaji wa kurejesha mikopo hiyo hasa katika baadhi ya makundi ya vijana na kuwataka kuhakikisha kwamba wanarejesha kwa wakati bila kuvunja taratibu zote zilizowekwa ili kuwapa fursa wengine waweze kupata.

Selina aliongeza kuwa mbali na halmashauri hiyo kutoa mikopo ya fedha, pamoja na vifaa mbalimbali lakini wanatarajia kuongeza wigo zaidi ya ukopeshaji ambao wameweka mikakati kabambe katika siku za usoni kuwezo kuvipatia vikundi mbali mbali mikopo mikubwa zaidi ikiwemo kuwapatia magari ambayo yatawasaidia katika kuendeshea biashara zao

Akikabidhi hundi ya fedha hizo  ambazo zimetolewa na halmashauri hiyo kwa vikundi hivyo,Mbunge  wa  jimbo  la  Kibaha  mjini  Silvestry   Koka ambaye alikuwa ndiye mgeni rasmi katika hafla hiyo iliambatana na ugawaji wa vifaa vinavyofanya shughuli za usafirishaji ikiwemo Bajaji, Pikipiki.pamoja na Toyo vyote vikiwa na thamani ya zaidi ya milioni 66 ikiwa ni kujikwamua kiuchumi.

Koka katika hotuba yake kwa wanavikundi hao aliwataka kuhakikisha kwamba fedha hizo ambazo wamepatiwa  na serikali kuzitumia vizuri kwa kufanya shughuli za ujasiriamali pamoja na kuanzisha biashara ambazo zitawasaidia kujipatia kipato ikiwemo na kukuza uchumi.

Pia Mbunge huyo aliviasa vikundi hivyo kujiwekea malengo na kwamba ili waweze kutimiza ndoto zao na kufanikiwa inapaswa waahakikishe kwamba wanakuwa na nidhamu katika fedha sambamba na kubuni biashara nyingine mpya ambazo zitaweza kuzaa matunda na kuwaahidi kuendelea kuwapa ushirikiano wa kutosha.

Aidha, alisema kwamba wananchi  pamoja na viongozi wa ngazi mbali mbali kuhakikisha kuwa wanakuwa mstari wa mbele katika kumpa ushirikiano wa kutosha Rais wa awamu ya sita Mama Samia Suluhu Hassan ili aweze kutumiza majukumu yake ipasavyo katika kulitumikia Taifa la Tanzania pamoja na kuwaletea chachu ya maendeleo wananchi katika Nyanja mbalimbali.

Koka alisema kwamba anatambua katika jimbo lake kuna baadhi ya changamoto  zilizopo hasa za miundombinu ya barabara inayokwenda katika hospitali ya Wilaya iliyopo maeno ya Lulanzi na kuwaahidi wananchi wake kulivalia njuga suala hilo kwa kushirikiana na serikali na mamlaka husika ili kuweka kiwango cha lami ili iweze kupitika kwa urahisi na wananchi waweze kwenda kupatiwa huduma ya matibabu bila kero yoyote.