JUKWAA LA WAHARIRI LAPATA VIONGOZI WAPYA,AHAIDI NEEMA KWA WAANDISHI

 

DEODARUS BALILE MWENYEKITI MPYA WA TEF

JUKWAA LA WAHARIRI LAPATA VIONGOZI WAPYA

Na Ashton Balaigwa,MOROGORO

JUKWAA la Waharri Tanzania (TEF) limemchagua Deodatus Balile, kuwa Mwenyekiti mpya wa Jukwaa hilo ataongoza kwa  kipindi cha miaka minne ijayo baada kupata kura 57 dhidi ya  mpinzani wake Neville Meena aliyepata kura 22 katika uchaguzi uliofanyika mkoani Morogoro.

Balile ambaye ni Mkurugenzi Mtendaji wa Gazeti la Jamhuri,kabla ya kushinda nafasi hiyo ya Uwenyekiti alikuwa Makamu mwenyekiti katika uongozi uliomaliza muda wake.

Akitangaza matokeo hayo Mwenyekiti wa Kamati ya Uchaguzi Frank Sanga, Wajumbe wa uchaguzi huo walikuwa 79 na hakuna kura iliyoharibika katika nafasi ya mwenyekiti huku nafasi ya Makamu Mwenyekiti ikichukuliwa na  Bakari Machumu ambaye ni Mkurugenzi Mteandaji wa Kampuni ya Mwananchi kwa kupata kura 53 na kumshinda Mpinzani wake Joyce Shebe kutoka Clauds Media aliyepata kura 26.

Akizungumza baada ya kushinda nafasi hiyo,Balile alisema kwa kushirikiana na viongozi wenzake anakusudia kufanya maboresho na kuongeza weledi kwa waandishi habari ili kufanya uandishi usio wa harakati bali ulenge kusaidia jamii kuleta maendeleo.

“ Uandishi wa habari sio uhanalakati bali ni kutumia wanyonge katika kuibua matatizo yao yanayowakabili katika jamii yaweze kupata ufumbuzi “ alisema Balile.

Mikakati mingine ni pamoja na kuanzisha mafunzo kwa waandishi wa habari ambao wanauzoefu wa muda mrefu lakini si wahariri ili kuwajengea uwezo wa kufanya vizuri katika majukumu yao ya kila siku.

Naye Makamu Mwenyekiti ,Machumu,alisema uongozi ulioingia madarakani utajieleza katika kuchochea maendeleo na kuwalea waandishi wa habari na kuruhusu kupanua wigo kuwa na wanachama wengi kutoka katika Taasisi tofauti tofauti ili kuleta maendeleo ya tasnia ya habari.

Katika nafasi ya wajumbe wa kamati tendaji waliochaguliwa ni Salim Said Salim akitokea Zanzibar kura (75)  Yassin Sadic  (69)Saimon Mkina(69)Jane Mihanji(63)Nevile Meena(62) Lilian Timbuka (55) Angela Akilimali(48).

Kwa upande wake Mwenyekiti wa Mkutano huo  Theophil  Makunga , aliwataka viongozi hao kutimiza ahadi zao walizotoa wakati wa kampeni na kwenda kuimarisha TEF kwa maendeleo ya waandishi wa habari na tasnia nzima ya habari hapa nchini.

Nae Msimamizi wa uchaguzi Mkuu wa TEF,ambaye ni Mkuu wa Mawasiliano Serikalini Wizara ya Afya ,Maendeleo ya Jamii,Jinsia,Wazee na Watoto Prudence Constantine,alisema uchaguzi huo ulikuwa huru na haki hakuna malalamiko.