WIZARA YA ELIMU KUKABIILI UFAULU MDOGO SOMO LA HISABATI NCHINI

 Katibu Mkuu wa Wizara ya Elimu, Sayansi na Teknolojia,Profesa Carolyne Nombo, akizungumza wakati wa ufunguzi wa mafunzo kazini kwa wakufunzi 155 wa somo la Hisabati kutoka Vyuo vya Ualimu 35 vya Serikali yanayoendelea mjini Morogoro.Lilian Lucas.

WIZARA YA ELIMU KUKABIILI UFAULU MDOGO SOMO LA HISABATI

Na Lilian Lucas, Morogoro

Wizara ya Elimu, Sayansi na Teknolojia imeanza kuzifanyia kazi changamoto zinazochangia ufaulu mdogo wa somo la Hisabati kwa wanafunzi wa Shule za Msingi na Sekondari kwa kuanzisha mafunzo maalumu kwa njia ya Teknolojia ya Habari na Mawasiliano (TEHAMA) kwa Wakufunzi wa somo hilo wa Vyuo 35 vya Ualimu nchi nzima ili kuongeza kiwango cha ufaulu.

Katibu Mkuu wa Wizara ya Elimu, Sayansi na Teknolojia,Profesa Carolyne Nombo, amesema hayo leo Julai 11,2923 wakati wa ufunguzi wa mafunzo kazini kwa wakufunzi 155 wa somo la Hisabati kutoka Vyuo vya Ualimu 35 vya Serikali yanayoendelea mjini Morogoro.

Profesa Nombo amesema mafunzo kwa wakufunzi hao ni moja ya utekelezaji wa lengo la serikali katika kuleta mageuzi katika somo la Hisabati.

Profesa Nombo amesema mpango huo wa Serikali utaimarisha mbinu za ufundishaji na ujifunzaji wa somo la hisabati ikiwa pamoja na kutumia TEHAMA katika kipindi ambacho Serikali inatekeleza mageuzi ya elimu nchini.

Amesema katika kufanikisha mpango huo wa kuinua ufaulu wa somo la hisabati,tayari Serikali kupitia wizara hiyo ya Elimu imewekeza kwenye ujenzi wa majengo mapya na kuimarisha miundombinu ikiwemo maabara na kuanzisha majengo mapya ya TEHAMA kwa kila chuo cha ualimu.

“Sisi sote tunafahamu kuwa kuna changamoto ya ufaulu katika somo la hisabati, mazingira ya kufundishia si mazuri hivyo serikali yetu imeamua kuwekeza kwa kiwango kikubwa katika vyuo vya Ualimu ili viweze kutoa walimu tarajali watakaofundisha somo hilo kwa shule za Msingi na Sekondari” amesema Katibu Mkuu huyo.

Baadhi ya wakufunzi 155 wa somo la Hisabati kutoka Vyuo vya Ualimu 35 vya Serikali  wakisfuatilia kwa makini katika mafunzo ya uboreshaji wa somo la Hisabati mjini Morogoro.Picha na.Lilian Lucas.

Profesa Nombo amesema tayari Serikali imewekeza kwa kujenga kituo cha Hisabati katika Chuo cha Ualimu Morogoro na kimewezeshwa vifaa mbalimbali vya kisasa vya  kitehama ikiwemo Vishkwambi, Kompyuta ambavyo kwa pamoja vinawezesha wakufunzi hao kujifunza hata wakiwa nje ya vituo vyao.

“Wakufunzi wote watapitishwa kwenye matumizi ya mifumo ya somo la hisabati ,matumizi ya vishikwambi kwa ajili ya kufundishia na kujifunzia na kuwajengea mbinu za kufundisha hisabati kwa kutumia TEHAMA”amesema.

Amesema baada ya mafunzo hayo wakufunzi hao watakwenda kuwawezesha walimu tarajali ambao nao watakwenda kufundisha wanafunzi wa shule za msingi na sekondari kwa lengo la  kuinua ufaulu wa somo hilo la hisabati.

Mkurugenzi Msaidizi wa Mafunzo ya Ualimu ,Huruma Mageni, amesema Wizara ya Elimu inaendelea na utekelezaji wa kazi mbalimbali za mradi wa kuendeleza elimu ya ualimu (TESP) ikiwemo kutoa mafunzo kazini kwa wakufunzi  wanaofundisha somo la hisabati.

Mageni amesema mafunzo hayo yanatolewa kwa wakufunzi wanaofundisha mafunzo ya ualimu wa ngazi ya Cheti na Diploma kutoka katika vyuo hivyo vyote 35 vya Ualimu vya serikali ambayo yanatolewa kwa njia ya mtandano.

Mratibu wa Mradi wa Kuendeleza Elimu ya Ualimu, Cosmas Mahenge amesema mafunzo hayo ya  Hisabati kwa njia ya TEHAMA yanatolewa kwa wakufunzi kutoka kanda ya kaskazini, mashariki, nyanda za juu kusini, kanda ya ziwa, magharibi, kati na kusini kwa lengo la uboreshaji wa somo hilo.

Mshauri mwelekezi wa mradi huo wa TESP, Dk Andrew Binde amesema wameanza na wakufunzi wa somo la Hisabati kwa kuwa tayari miundombinu yake imekamilika kwenye vyuo vya Ualimu kutokana na kuanzishwa kwa vituo vya TEHAMA na baadae kuinua katika masomo mengine.

Kwa upande wake, mkufunzi wa somo la Hisabati, Gloriana Kakuru kutoka Chuo cha Ualimu Morogoro amesema mafunzo hayo yatawasaidia kuwatia moyo hasa wanawake kuwa somo sio gumu na wajiamini kuwa wanaweza ili kufanya vyema katika masomo ya Hisabati na Sayansi.

Aidha, mkufunzi kutoka Chuo cha Ualimu Kleruu cha mkoani Iringa Kissa Mboya amesema mafunzo hayo yatakuwa msaada kwao kama wakufunzi wanaowandaa walimu na kutarahisisha kuandaa masomo na nyaraka za ufundishaji na ujifunzaji ikiwemo njia ya mawasiliano kwa kutumia majukwaa mbalimbali ya Hisabati.