CCM MOROGORO MJINI KUWAPA USHIRIKIANO WAANDISHI WA HABARI

 KATIBU WA CHAMA CHA MAPINDUZI WILAYA YA MOROGORO MJINI,AMIRI MKALIPA

CCM MOROGORO MJINI KUWAPA USHIRIKIANO  WAANDISHI WA HABARI

Na Loveness Nyawili

KATIBU wa Chama cha Mapinduzi,Morogoro Mjini,Amiri Mkalipa amesema CCM ina tambua mchango wa waandishi wa habari  katika kuhamasisha utekelezaji wa ilani ya chama hicho kwa wananchi kupitia  miradi ya kimkakati inayoendelea katika maeneo mbalimbali hapa nchini.

Mkalipa alibainisha hayo wakati alifanya mazungumzo na uongozi wa chama cha waandishi wa habari Mkoa wa Morogoro(MOROPC) Desemba 27,2022 alipofanya ziara yake ya kutembelea Taasisi na wadau wa maendeleo ikiwemo Waandishi wa Habari mkoa wa Morogoro.

“Waandishi wa Habari kama muhimiri wa nne wana nafasi kubwa ya kuhabarisha,kukosoa ikiwa ni kuonesha njia sehemu ambayo yenye changamoto ili wenye mamlaka waweze kuzipatia ufumbuzi.”Alisema

VIONGOZI WA MOROPC WAKIWA KATIKA PICHA YA PAMOJA NA KATIBU WA CCM WILAYA YA MOROGORO MJINI KATI KATI ALIYEVAAA SHATI JEUPE,AMIRI MKALIPA.

Alisema ofisi yake ipo tayari kushirikiana na waandishi wa habari kama wadau wakuu wa maendeleo kutokana na mchango mkubwa wanaoutoa katika kuhamasisha maendeleo na kufichua uovu katika ngazi ya jamii.

Kwa upande wake Mwenyekiti wa Chama cha Waandishi wa habari Mkoa wa Morogoro,Nickson Mkilanya alionesha kufurahishwa na hatua iliyofanywa na kiongozi huyo wa chama kwa kile alichokieleza kwamba ni viongozi wachache wenye mtazamo chanya kwa waandishi wa habari.

Mkilanya alisema kuwa wapo baadhi ya viongozi wamekuwa na mtazamo hasi kwa kuwaona waandishi wa habari ni maadui na hata wakati mwingine wamekuwa wazito kutoa ushirikiano kwa waaandishi wa habari hasa suala la utoaji wa taarifa zenye masilahi mapana kwa umma.

Aidha,Mkilanya amemhakikishia Kiongozi huyo kuwa waandishi wa habari watatoa ushirikiano wa kutosha kwa ofisi yake na kuwa mahusiano kati ya waandishi wa habari na wanasiasa ikiwemo ofisi ya chama hicho ngazi ya wilaya ya Morogoro mjini.

KATIBU WA CCM WILAYA YA MOROGORO MJINI,AMIRI MKALIPA KULIA AKIPEANA MKONO NA MWENYEKITI WA KLABU YA WAANDISHI WA HABARI MOROGORO,NICKSON MKILANYA MARA BAADA YA KUMALIZA ZIARA YAKE.

Alielezea pia mkakati wa maendeleo ya chama cha waandishi wa habari kwamba ni kuendeleza uwekezaji unaendana na mazingira yaliopo ikiwa ni sehemu ya kuleta chachu ya maendeleo kwa waandishi wa habari wa Mkoa wa Morogoro.

Lilian Lucas ni Katibu Mtendaji wa MOROPC alisema pamoja na jitihada za kuhakikisha ya kuwa mahusiano kati ya waandishi wa habari na wadau yanaimarika lakini zipo changamoto kwa baadhi ya taasisi za kiserikali zimekuwa hazitoi ushirikiano wa kutosha katika utoaji wa taarifa kwa wakati.

Lilian alisema kuwa hatua ya kiongozi huo kufanya ziara katika ofisi za waandishi wa habari zimefungua ukurasa mpya ambao utakuwa ni mfano wa kuigwa kwa wadau wengine ili kuwahudumia wananchi bila ya kuwepo kwa vikwazo visivyo vya lazima.