VIONGOZI WALIMU WANAWAKE ‘WAPIGANA MSASA’ SHERIA ZA KAZI

Kaimu Rais wa Chama cha Walimu Tanzania(CWT) Dinah Mathaman akitoa hotuba yake ya ufunguzi wa mafunzo ya siku mbili kwa walimu viongozi wanawake Mjini Morogoro.
 

VIONGOZI WALIMU WANAWAKE ‘WAPIGANA MSASA’ SHERIA ZA KAZI

Na Thadei Hafigwa,Morogoro

CHAMA cha walimu nchini kimeendesha mafunzo kwa walimu viongozi wanawake ikiwa ni moja ya mkakati wa kuwajengea uwezo wa kiutendaji katika masuala ya sheria za kazi na sheria mbalimbali za nchi sanjari na kujitokeza kugombea nafasi za uongozi wenye vyombo vya maamuzi.

Mafunzo hayo ya siku mbili yamefanyika Mjini Morogoro, Oktoba 8 na 9,2022 na kufunguliwa Kaimu Rais wa Chama Cha Walimu (CWT),Dinah Mathaman ambapo imewakutanisha walimu wanawake viongozi kutoka mikoa yote iliyopo Tanzania bara,

Elizabeth Werema ni wakilishi wa walimu wanawake taifa,alisoma risala kwa niaba ya wenzake alisema kuwa kitengo chao pamoja na mafanikio waliopata lakini wanakabiliwa na changamoto mbalimbali ikiwemo ufinyu wa bajeti za kuendesha shughuli zao pamoja na ukosefu wa akaunti yao katika ngazi ya kitaifa.

Mwakilishi wa Kitengo cha Walimu wanawake Taifa Chama cha Walimu Tanzania(CWT) Elizabeth Werema akisoma Risala mbele ya Mgeni Rasmi Kaimu Rais wa CWT, Dinah Mathaman.

Elizabeth alisema kuwa kitengo chao kimeonesha imani kubwa kwa viongozi kutoka na juhudi wanazofanya zilizosababisha kuongeza matumaini kwa wanachama na kuongeza marejesho ya Mikoa na Wilaya.

Aidha,alipongeza viongozi kamati tendaji taifa na baraza la taifa kwa kutenga bajeti japo hatoshi kulingana na mpango Mkakati walio nao kushindwa kutekelezwa kwa wakati, hivyo aliomba kwa mwaka mwingine bajeti ya kitengo hicho iongezwe ili kurahisha utendaji kazi wao.

Hata hivyo,kitengo kinatambua juhudi za viongozi katika kubainisha malengo na madhumuni ya uwepo wa kitengo kama ilivyoabinishwa na viongozi wa chama kwenye katiba,kanuni na sera ya jinsia na walimu wanawake.

Kaimu Rais wa Chama cha Walimu Tanzania(CWT) Dinah Mathaman Katikati kushoto kwake ni Kaimu Katibu Mkuu,Japhet Maganga,Kulia kwa mgeni rasmi ni Mwenyekiti wa Mkoa wa Morogoro,Jumanne Nyakirang'ani.

Alisema mwaka 2013 walianzisha sera ya jinsia na walimu wanawake wajumbe wa kamati mbalimbali katika matayarisho ya uanzishwaji wa sera ya jinsia na walimu wanawake iliweka dira kwamba ifikapo mwaka 2025 CWT iwe na wanachama wenye maarifa,ujuzi,ujasiri katika kutetea usawa wa jinsia ili walimu wanawake waweze kushiriki kikamilifu katika vyombo vya maamuzi  na uongozi katika ngazi zote.

Alisema mafunzo hayo yawashirikisha walimu wanawake viongozi nchini kote ambapo jumla ya washiriki 135 ili kupata maarifa na kufanya tathmini ya mfanikio na changamoto walizonazo hususan kitengo cha walimu wanawake.

Hata hivyo alisema kuwa hali ya kitengo walimu wanawake kipo imara kwamba wanaendelea na shughuli zao kwa kuzingatia vikao vya kikatiba,vikao vya dharura,huduma kwa wanachama, ziara  kwa wanachama, semina na warsha na mafunzo sanjari na kushiriki kwenye maadhimisho mbalimbali katika ngazi ya kimkoa na kitaifa.

“huduma kwa wanachama zinafanywa kwa kiasi kikubwa zinafanywa na kitengo cha walimu wanawake kwa kushirikiana na viongozi wa ngazi zote wilayani,kimkoa na kitaifa”Alisema

Alitaja baadhi huduma wanazozitoa ni pamoja kuwahudumia walimu wagonjwa na waliopata kadhia mbalimbali ikiwemo kushiriki katika kutatua migogoro kati ya wanachama na wanachama au wanachama na mwajiri yanayohusiana na masuala ya kijinsia.

Kuhusu  Changamoto Elizabeth katika risala yao zinazowakabili kitengo cha walimu wanawake pamoja na kukosekana kwa kasma inayojitegemea ndani ya chama cha walimu na kusababisha kupata bajeti ndogo hali inayowalazimu kunyanganyana na bajeti inayotengwa katika ngazi ya wilaya na mkoa hivyo kudhorotesha utendaji kazi kwa ufanisi.

Huku akipiga chepuo kurudishwa kwa asilimia 20 ya gharama za utendaji wa shughuli za kitengo chake kwenye ngazi ya wilaya na Mkoa,bila kuathiri utendaji wa kitengo maalum,kadhalika aliomba CWT makao makuu kufanya maamuzi ya kimkakati ya kuwafungulia akaunti ya kitengo chao kama ilivyo kwenye Wilaya na Mkoa.

                   Walimu viongozi wanawake Mafunzoni  Mjini Morogoro.

Akijibu risala hiyo,Kaimu Rais wa Chama cha Walimu Tanzania,Dinah Mathaman alisema ofisi yake itawasilisha hoja hizo katika kamati tendaji ili changamoto hizo ziweze kupatiwa ufumbuzi.

Mathaman aliwakumbusha walimu wanawake kujitambua, kujiamini na kuwa na moyo wa uthubutu kugombea nafasi mbalimbali za uongozi katika ngazi ya uamuzi.

alisema kazi iliyofanywa na walimu wanawake katika kuhakikisha walimu wanajisajiri kwenye chama ni kazi inayotakiwa kupongezwa kwamba ofisi yake itahakikisha ya kuwa kitengo hicho kinawezeshwa ili kuleta matokeo makubwa kwa siku zijazo.

Alisema kuwa wamekuwa na maadili mema kwa kuonesha jamii kuwa na mwelekeo bora na kukubalika katika jamii ili kuhakikisha taifa linasonga mbele.

Alisema wanawake wamekuwa wakishiriki kwenye nafasi mbaimbali za uongozi ikiwa ni moja ya kutua ya kuleta chachu ndani ya CWT na nje ya chama cha walimu.wapate ujasiri na kujiamini na kushiriki kwenye vyombo vya maamuzi.

Baadhi ya washiriki wa mafunzo hayo wakifuatilia kwa karibu hotuba ya  Kaimu Rais wa Chama cha Walimu Tanzania(CWT) Dinah Mathaman(hayupo pichani).

Alisema mwanamke akisimama katika nafasi mbalimbali imekuwa na matokeo chanja kutokana na tafiti mbalimbali zilizofanywa na wanazuoni ndani na nje ya nchi.

Aliahidi kuhakikisha ya kuwa asimilia 20 iliyokuwa ikitengwa kwa ajili ya kitengo cha walimu wanawake kinarejeshwa na kurahisisha katika utekelezaji wa majukumu yao.

Kwa upande wake,Kaimu Katibu mkuu CWT Taifa,Japhet Maganga aliwasihi walimu wanawake kuwa mstari wa mbele bila ya kuchoka katika kusimamia malezi katika ngazi ya familia ili kunusuru hali ya mmomonyoko wa maadili uliopo hapa nchini.

Aliwakumbusha kusimamia sera ya wanawake na badala ya kutegemea viongozi na kuepuka kwenda kwa matukio ili uimarisha kitengo cha wanawake walimu hivyo kujitokeza kwenye kugombea nafasi ya uongozi.

washiriki wa  Mafunzo kwa walimu viongozi wanawake  kutoka mkoa mbalimbali wakiwa makini katika mafunzo hayo yaliofanyika Mjini Morogoro.

Alisema ni vema kuwahimiza wajibu wao kwa mwajiri,familia,na malezi inapaswa kila mmoja kujitathmini namna ya kulitimiza lengo la kulea familia na taifa kwa ujumla.

Alisema ni vema kushirikiana na viongozi wanawake wanamiliki mali na kushimamia mirathi kikamilifu.kutumia elimu katika kutimiza wajibu na utatuzi wa migogoro katika maeneo wanayotoka kutokana na ujasiri na uvumilivu waliokuwa nao.

Aliwasa walimu kujiendeleza kitaaluma na hivi sasa walimu wamekuwa na ari ya kujifunza na kujiendeleza kielimu kwamba jukumu hilo ni kuwahimiza wengine walikuwa wazito katika kuongeza elimu.

Washiriki wa mafunzo wakiwa katika hamasa na shauku kubwa ya mafunzo hayo.

Aliwaasa walimu kuwaelimisha wengine hasa walimu wanawake waweze kushiriki kwenye masuala ya ujasiriamali ili kuongeza kipato cha ziara ili kutatua changamoto ndogondogo zilizopo katika ngazi ya familia.

Aliwasa walimu kujitathmini katika kuendesha nyimbo za hamasa kwenye vyombo vya habari ikiwemo luninga na redio.

Naye,Mwenyekiti wa chama cha walimu Mkoa wa Morogoro,Jumanne Nyakirang’ani alisema kuwa jukumu waliopewa viongozi wa chama cha walimu ni kuwahudumia wanachama kwa kutumia rasilimali zilizopo kwa ushirikiano wa pamoja.

Alisema kuwa Wanawake ni nguzo ya mambo yote,kwamba bila mama hakutakuwa na hatua za kwenda,mwanamke popote alipo ni mama,mwanamke ni rafiki,huku akinukuu sehemu ya mtunzi wa shairi  la Fitina kwamba “Fitina  titi la paka halifai kuwa mtindi,fitina ngozi ya tembo halifai kwa kuwambwa”

Alisema kuwa CWT ilifikiwa hatua ya kwenda hali jojo kutokana na kuwepo kwa viashiria vya fitina hivyo aliwaasa wale wote wenye ‘tabia ya uchawa’ kuachana na mwenendo huo na  badala yake kuilinda taasisi hiyo kwa kuwa ni inategemewa na wengi na imetoa ajira kwa wengi kote nchini.

Mafunzo hayo ya siku mbili yaliotolewa kwa walimu viongozi kitengo cha walimu wanawake wa chama cha walimu,kimelenga zaidi kuwaongezea  uelewa juu ya sheria za kazi pamoja na sheria za nchi, kutambua tume za utumishi wa walimu na kazi zao,kupata maarifa ya kuandishi wa taarifa na kuongeza ujuzi katika masuala ya uongozi.