SUA, WIOMSA YAWAKUTANISHA WANASAYANSI NA WADAU WA MAZINGIRA KUFANYA TATHIMINI UKANDA BAHARI YA HINDI

 SUA, WIOMSA YAWAKUTANISHA WANASAYANSI NA WADAU WA MAZINGIRA KUFANYA TATHIMINI UKANDA BAHARI YA HINDI

Na Lilian Lucas,Morogoro

Chuo Kikuu cha Sokoine cha Kilimo (SUA) kwa ushirikiano na Taasisi inayojishughulisha na tafiti za utunzaji wa Bahari (WIOMSA) imewakutanisha wanasayansi, Mameneja na wadau wengine wa mazingira ili kuwajengea uwezo wa namna ya kuendesha na kufanya tathimini ya maji kwa mazingira katika ukanda wa Magharibi mwa Bahari ya Hindi.

Akizungumza jana katika mkutano wa mazingira wa kimataifa ambao wanapata mafunzo na kuwajengea uwezo  wadau hao wa mazingira Mkuu wa Wilaya ya Mbarali Reuben Mfune alisema baada ya kupata mafunzo hayo watahakikisha wanakwenda kuyafanyia kazi na kuwafundisha wengine kwenye ofisi wanazotoka ili kutimiza malengo.

Mfune alisema wale ambao wako ukanda wa juu ya mto unakoanzia wanatakiwa kujua fika shughuli za uharibifu wanazozifanya kule ndizo zinazopelekea athari kwenye mabwawa ambayo hujaa tope na kwenda mojakwa moja Baharini na kuathiri viumbe vilivyomo katika Mito, Maziwa na Bahari.

Mfune amewapongeza SUA na WIOMSA kwa kuandaa mafunzo hayo kwa kuwa yanaendana na kazi inayoendelea ya kurejesha afya ya Mito na kupunguza madhara yanayotokana na uchafuzi wa Mazingira katika mito, kwani ni jambo jema kufanyika na litakuwa msaada kwa Taifa.

Aidha amesema zipo shughuli nyingi za kibinadamu zinazofanywa kwenye vyanzo vya maji na kandokando ya mito nchini kama vile ukataji miti hovyo, ufugaji usionzingatia ukubwa wa eneo ambapo amewataka Wananchi kuunga mkono jitihada zinazochukuliwa na serikali katika kusimamia sheria na kanuni zilizowekwa ili kuhifadhi mito na mazingira kwa faida ya kizazi cha sasa na kijacho.

“Maji yana umuhimu kwa taifa zima kama bwawa la Nyerere ambalo linajengwa kwa gharama kubwa, iwapo litashindwa kufanya kazi kutokana na ukosefu wa maji maana yake serikali itakuwa imepoteza fedha hizo bure, lakini pia tuna bwawa la umeme la Mtera na Kidatu haya yote yasipoweza kufanya kazi tutakuwa tunapunguza uwezo wa kuwa na Tanzania ya viwanda,”alisema Mfaune.

Alisema wadau wengine wanatakiwa kuendelea kujitokeza kusadia jitihada za Serikali na wadau waliopo sasa ili kuhakikisha Mito inaendelea kutiririka maji kwa mwaka mzima na kwamba  wananchi kutakuwa kuheshimu Sheria zilizowekwa kwa kuwa zipo kwa manufaa ya watanzania wote.

Akizungumzia mafunzo hayo Mtafiti Mkuu wa Mradi kutoka (SUA) Profesa Japhet Kashaigili alisema lengo la mafunzo hayo ni kujenga Wataalamu utaalamu wa kuweza kufanya tathimini ya maji kwa mazingira ili kusaidia wanapofanya maamuzi katika kugawana maji iwe kwa ajili ya maendeleo endelevu na si vinginevyo.

Profesa Kashaigili alisema mafunzo hayo yamelenga kujenga uwezo kwa vitendo na kuona shughuli zinazofanyika kama sehemu ya kuhifadhi mazingira na kilichopelekea shughuli hizo zifanyike pamoja sababu za msingi za kuwezesha tathimini ya maji kwa mazingira.