NGO ZATAKIWA KUWASILISHA TAARIFA ZAO KWA MSAJILI KWA WAKATI

Mkurugenzi Idara ya Usajili wa NGO,Wizara ya Afya,Maendeleo ya Jamii,Jinsia,Wazee na Watoto,Mussa Sanganya akiongea na  Wawakilishi wa Mashirika Yasiyo ya Kiserikali Mkoa wa Morogoro

Na Thadei Hafigwa

MASHIRIKA yasiyo ya Kiserikali hapa nchini yametakiwa kuzingatia sheria kwa kuwasilisha taarifa kwa msajili kwa wakati ili kuepuka mikwamo ya uendeshaji wa shughuli za kuibudumia jamii huku wakitakiwa kuondokana na hofu wakati serikali ikiwa katika kuboresha mifumo itakayorahisisha utoaji wa vibali katika ngazi ya serikali za mitaa.

Mkurugenzi, ofisi ya msajili wa NGO,Wizara ya Afya,Mussa Sanganya alitoa rai hiyo Mjini Morogoro wakati wa Mkutano maalum uliyokutanishwa mashirika yasiyo ya Kiserikali yaliopo Mkoa wa Morogoro ili kuboresha mahusiano kati ya serikali na mashirika hayo,Mkutano ulioratibiwa na Mtandao wa Mashirika yasiyo ya Serikali Mkoa wa Morogoro(UNGO)

Sanganya alisema ya kuwa licha ya kuwepo na changamoto mbalimbali za kiutendaji kwa siku za nyuma lakini kwa sasa serikali imeboresha mifumo yake kwa kuwarahisishia wananchi wanaotaka kusajili NGO kwa kuweka mifumo yote kwa njia ya mtandao.

“serikali ilitambua changamoto mnazozipata wakati wa zoezi la usajili wa NGO,wananchi walikuwa wakipata usumbufu wa kuja wizarani kushughulikia usajili,inapobainika nyaraka zao kuwa na dosari wanalazimika kurudi walipotoka ili kuzirekebisha,adha hiyo kwa sasa haipo tena kila kitu kipo kwenye mtandao na usajili unafanyika huko huko walipo.”Alisema Sanyang

 Alisema serikali inatambua mchango wa asasi za kiraia kwamba serikali inatimiza wajibu wake na kuyataka mashirika yasiyo ya kiserikali kutimiza wajibu wao ili kuihudumia jamii hasa zinazoishi pembezoni.

MWENYEKITI WA UMOJA WA MASHIRIKA YASIYO YA KISERIKALI MKOA WA MOROGORO(UNGO),DEOGRASIA IGNAS AKITOA TAARIFA YA  MPANGO MKAKATI  WA MIAKA MINNE KWA WAJUMBE  WA WALIOSHIRIKI MKUTANO HUO(HAPO PICHANI)

Awali,Mwenyekiti wa umoja wa Mashirika yasiyo ya Kiserikali Mkoa wa Morogoro (UNGO),Deograsia Ignas alitoa taarifa ya mkakati wa miaka minne ikiwemo kuunga mkono juhudi za serikali kwa kuanzisha program za kuhamasisha amani na utengamano wa wananchi na wadau wengine wa maendeleo wanaofanyakazi mkoani hapa.

Deograsia,amesema kuwa Mtandao wa Mashirika yasiyo ya Kiserikali itahkikisha ya kuwa inawahudumia jamii kwa kuhakikisha mitandao ya NGO iliopo Wilayani inaimarika kimifumo na kutoa mchango mkubwa wa kuhudumia wanachama wake ili jamii iweze kukabiliana na changamoto za kimaendeleo.

KATIBU MTENDAJI WA UMOJA WA MASHIRIKA YASIYO YA KISERIKALI MKOA WA MOROGORO(UNGO),DK.SAIDI SIMON AKISISITIZA JAMBO KWA WAJUMBE WA MKUTANO (HAWAPO PICHANI)

Kwa upande wake Katibu Mtendaji wa UNGO,Dk.Saidi Simoni alisema kuwa Mtandao huo imesajili kisheria mwaka 2000 kwa namba ya usajili SO.NO.10101 ambapo  ilipita katika awamu tofauti za utekelezaji wa shughuli za kuihumia jamii kwa kuibua miradi mbalimbali katika ufuatiliaji wa rasilimali za umma na usimamizi wa fedha.

Katika Mkutano huo uliojumuisha wadau mbalimbali wa mashirika yasiyo ya kiserikali yaliopo hapa nchini na mashirika yakimataifa walielezea changamoto mbalimbali ikiwemo uharibifu wa mazingira na changamoto wanazokabiliana nazo ikiwemo jamii yenye ulemavu wa afya za akili kukokosa fursa za kurahisishiwa katika uundwaji wa vikundi vyao.

BAADHI YA WASHIRIKI WA MKUTANO HUO WAKIFUATILIA KWA KARIBU HOJA ZILIZOKUWA ZIKIWASILISHWA NA VIONGOZI 

Venance Mlali Mkurugenzi wa Shirika la Wanawake Mafiga lililopo Manispaa ya Morogoro alisema kuwa jamii yenye changamoto za afya ya akili wanajikuta kwenye wakati mgumu katika kukabiliana na matakwa ya kiserikali wakati wa kuundwaji wa vikundi vyao hivyo alipendekeza kuwa ni muda muafaka kwa serikali kuangalia namna bora ya kuwarahisishia kundi hilo ambalo limeonekana kusahaliwa.

WASHIRIKI WA MKUTANO MAALUM WA MASHIRIKA YASIYO YA KISERIKALI MKOA WA MOROGORO WAKIWA KATIKA PICHA YA PAMOJA NA MKURUGENZI IDARA YA USAJILI WA NGO,WIZARA YA AFYA,MAENDELEO YA JAMII,JINSIA,WAZEE NA WATOTO,MUSSA  SANGANYA 

Aidha,wajumbe wa mkutano huo walitoa maazimio kadhaa yatakayowasilishwa serikalini kupitia ofisi ya mkuu wa Mkoa wa Morogoro ili kuangalia namna ya kuweza kuyapatia ufumbuzi,huku Mkurugenzi msaidizi ofisi ya usajili wa NGO akiahidi kuzipatia ufumbuzi changamoto zilizoelekezwa kwenye ofisi ya msajili.