SERIKALI YAWEKA MPANGO ENDELEVU WA UPIMAJI ARDHI

WAZIRI WA  WIZARA YA ARDHI, NYUMBA NA MAENDELEO YA MAKAZI, WILLIAM LUKUVI

     SERIKALI YAWEKA MPANGO ENDELEVU WA UPIMAJI ARDHI.

Na Lilian Lucas Morogoro

KATIKA kipindi cha miaka mitano ijayo Serikali imelenga kupima takribani asilimia 37 ya ardhi kwa ajili ya uwekezaji, makazi, biashara na matumizi mengine ya ardhi.

Waziri wa  Wizara ya Ardhi, Nyumba na Maendeleo ya Makazi, William Lukuvi alisema hayo juzi mjini Morogoro katika  hotuba yake iliyosomwa na Katibu mkuu wa wizara hiyo,Mary Makondo, kwenye  uzinduzi wa Kongamano la Kitaifa la masuala ya Ardhi katika kuadhimisha miaka 20 ya utekelezaji wa sheria za ardhi nchini.

Kongamano hilo, lililoshirikisha washiriki kutoka Taasisi za Umoja wa Mataifa, washirika wa maendeleo na Asazi za Kiraia na Sekta Binafsi  lilikuwa na Kauli mbiu ; Utekelezaji thabiti wa sheria za ardhi  ni msingi wa usalama wa milki za ardhi kwa wananchi  katika kufikia  Maendeleo Endelevu”.

 Waziri Lukuvi alisema, lengo hilo litafikiwa kwa kutekeelza miradi mbalimbali katika mamlaka za upangaji  kwa kushirikiana na Mamlaka za Serikali za Mita na wadau wengine.

Lukuvi alisema, licha ya juhudi zinazofanywa na Serikali kuhakikisha kila kipande cha ardhi kinapangwa, kupimwa na kumilikishwa   na  wananchi  kuwa na milki salama , kwa sasa ni asilimia takribani 25 ya ardhi ambayo imepangwa , kupimwa na kulimilishwa.

WASHIRIKI WA KONGAMANO LA ARDHI WAKIWA KATIKA MAJADILIANO, KONGAMANO HILO LIMEANDALIWA NA JUKWAA LA ARDHI TANZANIA TALA MJINI MOROGORO.

Lukuvi alisema, hali hiyo inachangiwa na uhaba wa rasilimali fedha na ukubwa wa nchi yetu inayotakiwa kupimwa na kumilikishwa .

“Tanzania ni moja wapo ya nchi kubwa Barani Afrika  na hivyo, imeweka mikakati madhubuti ya kuhakikisha kila kiande cha ardhi kinapangwa , kupimwa na kumilikishwa ambayo ndiyo suluhusho la kudhibiti migogoro ya matumuzi ya ardhi isiendelee kujitokeza “ alisema Lukuvi.

Kwa upande wa udhibiti wa migogoro  ya matumizi ya ardhi, Waziri alisema Serikali chini ya wizara hiyo inaendelea kutatua migogoro na kero mbalimbali za wananchi kwa njia mbalimbali ikiwemo  ya Programu ya Funguka kwa Waziri ambayo imeweka utaratibu wa kufanya mikutano mbalimbali na wananchi wenye kero au changamoto zinazohusiana na sekta ya ardhi maeneo mbalimbali nchini na kuzipatia ufumbuzi wa papo kwa hapo.

Waziri pia alitumia fursa hiyo kuipongeza Tanzania Land Alliance (TALA) kwa kubuni na kufabnikisha kongamano hilo ambalo lilioenga kujadili masuala mbalimbali yanayohusu haki za ardhi za wazalishaji wadogo.

Naye, Mratibu wa TALA, Bernard Baha, katika taarifa yake alisema, Jukwaa hilo limewezesha kutoa elimu kwa wananchi wakiwemo wakulima na wafugaji  katika kutambua haki za kisheria na wajibu wao wa umiliki wa ardhi nchini .

Kwa upande wake Profesa Issa Shivji, akiwasilisha mada ya masuala ya ardhi na mustakabali wa haki za ardhi za wazalishaji wadogo kwa njia ya mtandao alisema, siku hizi mchakato wa umilikishwaji wa ardhi umepamba moto na lengo la Wizara yenye dhamana ni kuona maendeleo yanapatokana kupitia ardhi iliyopo na kutaka elimu zaidi itolewa kwa wananchi  hasa wa vijijini.

Kwa upande uzalishaji wa mazao, alisema, kilimo cha wakulima wadogo bado hakina  tija  kwa vile hawajawekewa  mazingira rafiki yanayowezesha  wazalishe kwa tija tofauti na kilimo cha wakulima  wakubwa chenye tija  kwa kuwa wao wamewekewa mazingira mazuri  katika uzalishaji.