CHANGAMOTO YA AJIRA TANZANIA VIJANA 65,000 WAFIKIWA ILI KUKUZA UJUZI

 CHANGAMOTO YA AJIRA TANZANIA VIJANA 65,000 WAFIKIWA ILI KUKUZA UJUZI

Na.Lilian Lucas,Moogoro

KUTOKANA na kuwepo kwa Changamoto ya ajira Serikali ya Tanzania imeweza kuwafikia vijana zaidi ya 65,000 kwa kuwawezesha kukuza ujuzi ili waweze kuajirika na kujiajiri wenyewe.

Afisa Maendeleo ya Vijana, Uratibu, na Uwezeshaji vijana kiuchumi toka ofisi ya Waziri Mkuu Nassibu Mwaifunga alisema hayo wakati wa Kikao cha wadau wa mradi wa mabadiliko katika Sekta ya Ajira kwa Manufaa ya Jamii Afrika Mashariki (TESCEA) kupitia Chuo Kikuu cha Mzumbe.

Mwaifunga alisema tatizo la ajira limekuwa likiwalenga hasa vijana na kila mwaka kupitia program ya Ukuzaji Ujuzi kwa watanzania (SDL) imekuwa ikiwafadhili vijana zaidi ya 5,000 na wamekuwa wakinufaika na serikali imekuwa ikifanya hivyo kwa mujibu wa waajiri wa makapuni na taasisi za serikali na nyingine za binafsi wanaleta mahitaji yao ya vijana wenye sifa na ujuzi wanaoutaka na kupatiwa.

“Ili kuhakikisha vijana wanakuwa na maarifa na ujuzi wa kisasa kukabiliana na changamoto ya ajira Serikali imekuwa ikiratibu program ya utambuzi wa ujuzi uliopatikana nje ya mfumo rasmi wa elimu kwa maana ya kuwapa kozi ya muda mfupi kwa lengo la kuziba pengo la ajira,”alisema.

Alisema, kimsingi Serekali inaendelea kutenga na kuwahudumia vijana kwa sababu ni kundi kubwa wanahitajika, na Chuo Kikuu Mzumbe kimekuwa mstari wa mbele hususani kwa namna kinavyotoa maarifa kwa vijana wahitimu kwa lengo la kuwaandaa kuingia na kushindana kwenye soko la ajira.

Mratibu wa jukwaa la wadau wa Mradi, Musali Milanzi toka Mzumbe alisema kama chuo wamekuwa wakiwaongezea uwezo waalimu wa kufundisha wanafunzi na kubadili mbinu za ufundishaji na kuangalia mitaala itakayoendana na mahitaji ya soko.

Pia, Milanzi alisema mradi una lengo la kukuza na kuwajibika kwa wanafunzi na hatua ambazo zitawafanya kuweza kuajirika kwa upande wa sekta binafsi, Serikali na hata kutengeneza wenyewe ajira zao.

Mwanafunzi Samuel Elisha, alisema kuwepo kwa mradi kama huo unawawezesha kusaidia kuzalisha wanafuzni ambao wanakuwa na ujuzi wa kufikiria mbali tofuti na ilivyokuwa zamani na wamekuwa wakijijengeana uwezo wa kujiamini kuwa wanapomaliza masomo wasitegemee ajira ya kuajiliwa moja kwa moja na badala yake wawe na uwezo wa jiajiri pia.