RC SHEGELA ATEKELEZA MAAGIZO YA RAIS SAMIA,WAFANYABIASHARA KICHEKO

 

MKUU WA MKOA WA MOROGORO,MARTNE SHIGELA

RC SHIGELA ATEKELEZA MAAGIZO YA RAIS SAMIA SAMIA

Na Severin Blasio,Morogoro

MKUU wa mkoa wa Morogoro Martine Shigela amepiga marufuku halmashauri ya Manispaa Morogoro kutumia jeshi la akiba`mgambo`katika ukusanyaji wa mapato badala yake watumike kulinda majengo.

Shigela ametoa  agizo hilo juzi ikiwa ni siku chache Rais Samia Suluhu Hassani kutengua uteuzi wa mkuu wa wilaya  ya Morogoro Bakari Msulwa na Mkurugenzi wa Manispaa ya Morogoro Sheila Lukuba kwa tuhuma za askari hao kuwapiga wafanyabiashara wa mbogamboga wakidaiwa kufanya biashara kinyume cha sheria.

“Kuanzia muda huu naagiza wakurugenzi wote kuwa sitaki kusikia operesheni ya kutumia  mgambo kuwabughudhi wafanyabiashara ndani ya mkoa huu.

“Kama mnawahitaji askari hao,watumie katika kulinda majengo yenu ,na siyo kuwatumia katika ukusanyaji wa kodi’Alisema Shigela.

Aidha, Shigela ametoa agizo la kupunguza tozo mbalimbali katika soko la Kingalu zikiwemo za vizimba,vioski,wauza mitumba huku akifuta tozo za boda boda na bajaj kwa lengo la kuwavutia wafanya biashara ambao walikimbia soko hilo na baadhi yao kuanza kupanga bidhaa kando ya barabara.

Akizungumza na wafanyabiashara na machinga Shigela alisema ametoa agizo hilo ili kupunguza masoko holela ambayo yamekuwa yakijitokeza katika manispaa hiyo na hivyo kuathiri biashara zilizopo kwenye soko hilo ikiwa ni pamoja na kupunguza mapato ya halmashauri.

Kwa mjibu wa Shigela tozo hizo zimepungua kutoka shilingi 20,000 hadi shilingi 10.000 kwenye vizimba,shilingi  200,000 hadi shilingi 50,000,fremu za juu ,shilingi 300,000 hadi shilingi 100,000 frem za chini na shilingi 100,000 hadi 30,000 kwa wauza mitumba.

Shigela alisema utaratibu huo utaanza Julai mosi mwaka huu na  utadumu kwa muda wa miaka miwili jambo ambalo wafanyabishara hao wameridhia.

Awali, mwenyekiti wa soko la Kingalu, Halid Mkunyagale alimwambia mkuu wa mkoa huyo, kuwa wafanyabiashara wa soko hilo wana kero  ya masoko holela,tozo za gharama ya pango,maji na kukatwa kwa umeme.

Akijibu kero hizo, pamoja na mambo mengine,meneja wa soko hilo, Mwajui Sanga, alikiri kuwepo kwa kero hizo akidai tozo hizo zimepangwa kwa ajili ya kusaidia kutoa huduma mbalimbali kama vile kampuni inayofanya usafi na  kulipia ankra za maji.

Hata hivyo, Meya wa manispaa hiyo, Pascal Kihanga amekubali agizo la mkuu wa mkoa la kupunguza tozo za pango ikiwa ni pamoja na kuweka utaratibu mzuri w kuhakiisha wafanyabiashara wote watakaohamia hapo wanapata nafasi

Soko la Kingalu toka lifunguliwe mwaka huu limekuwa na changamoto mbalimbali ikiwa ni pamoja na uwepo ukilitimba wa wafanyabiashara kushindwa kupata sehemu ya kuuzia na kupelekea baadhi yao kupanga bidhaa zao kando ya barabara.